ລັດຖະບານອົສຕຣາລີ ໄດ້ນໍາເອົາເຄື່ອງຊ່ວຍເຫຼືອສົ່ງມອບໃຫ້ແກ່ລັດຖະບານລາວ ເພື່ອປະກອບສ່ວນຮັບມືກັບໄພພິບັດ ໃນ ສປປ ລາວ ຈຳນວນ 8 ໂຕນ ລວມມູນຄ່າ 1,4 ຕື້ກີບ, ຊຶ່ງເຄື່ອງຊ່ວຍເຫຼືອເຫຼົ່ານີ້ ເປັນສິ່ງທີ່ຈໍາເປັນສໍາລັບຊຸມຊົນ ກໍຄືປະຊາຊົນ, ຫຼັງຈາກໄດ້ຮັບຜົນກະທົບຈາກໄພພິບັດ, ການທີ່ໄດ້ມອບ-ຮັບຄັ້ງນີ້ຈະສາມາດຊ່ວຍເຫຼືອປະຊາຊົນ ໄດ້ຫຼາຍກວ່າ 200 ຄອບຄົວ.
ພິທີມອບ-ຮັບ ໄດ້ຈັດຂຶ້ນໃນວັນທີ 12 ກັນຍານີ້, ພາຍຫຼັງທີ່ເຮືອບິນ C-17 ຂອງກອງກຳລັງທະຫານອາກາດອົສຕຣາລີ ເດີນທາງມາເຖິງສະໜາມບິນສາກົນວັດໄຕ; ທ່ານນາງ ເມແກັນ ຈອນສ ເອກອັກຄະລັດຖະທູດອົສຕຣາລີ ປະຈໍາ ສປປ ລາວ ໄດ້ມອບເຄື່ອງຊ່ວຍເຫຼືອໃຫ້ແກ່ ທ່ານ ລີປາວ ຢ່າງຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຕາງໜ້າລັດຖະບານລາວຂຶ້ນຮັບ.
ໂອກາດດັ່ງກ່າວ, ທ່ານ ນາງ ເມແກັນ ຈອນສ ກໍໄດ້ກ່າວວ່າ: ອົສຕຣາລີ ຍິນດີທີ່ໄດ້ໃຫ້ການຊ່ວຍເຫຼືອ ລັດຖະບານ ສປປ ລາວ ໃນການກຽມຄວາມພ້ອມເພື່ອຮັບມືກັບໄພພິບັດສຸກເສີນທາງທໍາມະຊາດ, ເຄື່ອງທີ່ນໍາມາມອບປະກອບມີ: ຊຸດເຄື່ອງຄົວ 80 ຊຸດ, ຜ້າຫົ່ມ 400 ຜືນ, ມຸ້ງ 240 ດາງ, ສາດຢາງ 400 ຜືນ, ຜ້າບັດຢາງ 448 ຜືນ, ຊຸດອຸປະກອນຈົກສຽມ 224 ຊຸດ. ການກຽມພ້ອມຢ່າງມີປະສິດທິພາບ ແມ່ນມີຄວາມສໍາຄັນໃນການປົກປ້ອງຊຸມຊົນ ແລະ ຊີວິດການເປັນຢູ່ຂອງປະຊາຊົນ.
ທ່ານ ລີປາວຢ່າງ ກ່າວວ່າ: ພວກເຮົາຮູ້ສຶກຍິນດີທີ່ ອົສຕຣາລີ ໄດ້ໃຫ້ການສະໜັບສະໜູນ ສປປ ລາວ ຢ່າງຕໍ່ເນື່ອງ ໃນການຮັບມືກັບໄພພິບັດ. ລັດຖະບານລາວ ຕີລາຄາສູງ ຕໍ່ກັບການຊ່ວຍເຫຼືອຈາກລັດຖະບານ ອົສຕຣາລີ ໂດຍສະເພາະ ແມ່ນເຄື່ອງຊ່ວຍເຫຼືອ ທີ່ໄດ້ຮັບໃນມື້ນີ້ ເພື່ອນໍາໃຊ້ຮັບມືກັບໄພພິບັດ. ບັນດາເຄື່ອງຊ່ວຍເຫຼືອດັ່ງກ່າວ, ຈະຊ່ວຍເພີ່ມທະວີການກຽມຄວາມພ້ອມ ໃນການຮັບມືກັບໄພພິບັດ ໂດຍສະເພາະ ແມ່ນໄພນໍ້າຖ້ວມໃນລະດູຝົນ.
ຂ່າວ-ພາບ: ສຸກສະຫວັນ, ປະຊາຊົນ