ໃນໂອກາດລາຍງານຕໍ່ກອງປະຊຸມຮັບຟັງການລາຍງານ ແລະເຜີຍແຜ່ຂໍ້ມູນຂ່າວສານໂຄງການຂົນສົ່ງແບບຍືນຍົງໃນຕົວເມືອງນະຄອນຫຼວງວຽງຈັນ (ນວ) ທີ່ຈັດຂຶ້ນ ເມື່ອບໍ່ດົນມານີ້, ທ່ານ ຄຳພັນ ວັນທະນາ ຫົວໜ້າໂຄງການຂົນສົ່ງແບບຍືນຍົງ ໃນຕົວເມືອງ ນວ ໃຫ້ຮູ້ວ່າ: ໂຄງການຂົນສົ່ງແບບຍືນຍົງໃນຕົວເມືອງມາຮອດປັດຈຸບັນກຳລັງດຳເນີນການປັບປຸງ, ສ້ອມແປງ, ກໍ່ສ້າງຫຼາຍໜ້າວຽກເປັນຕົ້ນຖະໜົນສຳລັບລົດເມດ່ວນ, ລົດຖີບ ແລະຄົນຍ່າງ, ອູ່ລົດເມ BRT, ສູນສ້ອມແປງ ແລະອື່ນໆປະຕິບັດໄດ້ແລ້ວ62% ແລະຈະໃຫ້ສຳເລັດໃນເດືອນທັນວາ 2024.
ທ່ານ ຄຳພັນ ວັນທະນາ ກ່າວອີກວ່າ: ຖະໜົນສຳລັບລົດເມດ່ວນ, ລົດຖີບ ແລະ ຄົນຍ່າງສະຖານີໃຫຍ່ ຫຼື Transit Mall ແມ່ນເຂດສະເພາະສຳລັບລົດເມດ່ວນ, ລົດຖີບ ແລະຄົນຍ່າງ ມີຄວາມຍາວປະມານ 600 ແມັດ ຢູ່ຕາມຖະໜົນເສດຖາທິລາດ ເລີ່ມຈາກຖະໜົນຂຸນບູລົມ ສີ່ແຍກໄຟແດງວັດອິນແປງຫານ້ຳພຸ.
ການສ້າງຖະໜົນດັ່ງກ່າວໂດຍມີຈຸດປະສົງ ເພື່ອສົ່ງເສີມການຂີ່ລົດຖີບ ແລະການຍ່າງ, ປັບປຸງການເຂົ້າເຖິງຂົນສົ່ງສາທາລະນະເພື່ອໃຫ້ມີພື້ນທີ່ສໍາລັບຄົນຍ່າງຫຼາຍກວ່ານໍາໃຊ້ຍານພາຫະນະ, ຫຼຸດຜ່ອນມົນລະພິດໃນໃຈກາງຕົວເມືອງ. ໃນລະບົບການເກັບຄ່າໂດຍສານສາທາລະນະ, ລົດເມທຸກຄັນຕິດຕັ້ງອຸປະກອນກວດສອບລະບົບຈ່າຍຄ່າໂດຍສານ; ນໍາໃຊ້ບັດ smart card ຊຳລະຄ່າໂດຍສານ; ຜູ້ໂດຍສານຍັງສາມາດຈ່າຍເງິນຄ່າບໍລິການຜ່ານໂທລະສັບມືຖື ທີ່ມີການສົມທົບກັບລະບົບບັນຊີທະນາຄານ; ຜູ້ໂດຍສານທີ່ບໍ່ໃຊ້ໂທລະສັບມືຖື, ສາມາດຊື້ປີ້ລົດເມດ່ວນຢູ່ສະຖານີຫຼັກ ແລະຈຸດຂາຍປີ້ໂດຍສານໃດໜຶ່ງກໍໄດ້.
ປັດຈຸບັນ, ໄດ້ກະກຽມລົດເມໄຟຟ້າ BRT 82 ຄັນພ້ອມດ້ວຍບ່ອນສາກໝໍ້ໄຟແລະຈະມີການຝຶກອົບຮົມການບຳລຸງຮັກສາ, ການສ້ອມແປງ, ສະຖານີລ້າງ ແລະ ສິ່ງອຳນວຍຄວາມສະດວກອື່ນໆສຳລັບຄົນຂັບລົດ ແລະພະນັກງານ.
ຂ່າວ: ປະຊາຊົນ