ໃນວັນທີ 30 ສິງຫາທີ່ຜ່ານມາ, ກອງບັນຊາການ ປກສ ເມືອງອຸທຸມພອນ ໄດ້ຈັດພິທີຖະແຫຼງກ່ຽວກັບການແກ້ໄຂມ້າງຄະດີກຸ່ມແກ້ງຊື້ຂາຍຊັບ ບໍ່ຖືກຕ້ອງຕາມກົດໝາຍໂດຍມີແມ່ນທ່ານ ພັນໂທ ສົມສັກ ຈັນທະລາສອນ ຫົວໜ້າກອງບັນຊາການ ປກສ ເມືອງ ພ້ອມພາກສ່ວນກ່ຽວຂ້ອງເຂົ້າຮ່ວມ.
ທ່ານ ພັນໂທ ສົມສັກ ຈັນທະລາສອນ ຫົວໜ້າກອງບັນຊາການ ປກສ ເມືອງອຸທຸມພອນ ລາຍງານໃຫ້ຮູ້ວ່າ: ການແກ້ໄຂມ້າງລາຍຄະດີກຸ່ມແກ້ງຊື້ຂາຍຊັບບໍ່ຖືກຕ້ອງຕາມກົດໝາຍ ເປັນຕົ້ນບັນຫາການມົ້ວສຸມເສບຢາເສບຕິດ, ດື່ມນໍ້າກະທ້ອມ, ຂາຍນໍ້າກະທ້ອມ, ໃບກະທ້ອມ ມາສຶກສາອົບຮົມກ່າວເຕືອນໃຫ້ເຫັນໄດ້ຜົນຮ້າຍຂອງຢາເສບຕິດ ຈໍານວນ 23 ຄົນ.
ບັນຫາລັກຊັບ ຊິງຊັບ(ລັກລົດຈັກ) ທີ່ມີການເຄື່ອນໄຫວລັກຊັບ ພັກເຊົາຢູ່ຫ້ອງແຖວແຫ່ງໜຶ່ງ, ພາຍຫຼັງທີ່ກວດກາສໍາເລັດໄດ້ນໍາເອົາລົດຈັກຈໍານວນ 30 ຄັນ ແລະ ຊິ້ນສ່ວນລົດຈັກທີ່ຖືກມ້າງ ແລະ ລົດກະບະ ອີຊູຊຸ ດີແມັກ ຈໍານວນ 2 ຄັນ ມາກວດກາ ແລະ ຮັກສາໄວ້ຢູ່ກອງບັນຊາການ ປກສ ເມືອງ. ພ້ອມທັງກັກຕົວຜູ້ຕ້ອງສົງໃສ ມາທໍາການສືບສວນ-ສອບສວນ.
ຜ່ານການສືບສວນ-ສອບສວນຂອງກຸ່ມແກ້ງພວກຊື້-ຂາຍຊັບທີ່ບໍ່ຖືກຕ້ອງຕາມກົດໝາຍໄດ້ທັງໝົດ 8 ຄົນ ແລະ ຄົນຕ່າງປະເທດ 2 ຄົນ ທີ່ເຂົ້າເມືອງຜິດກົດໝາຍ, ເຊິ່ງຈະໄດ້ດຳເນີນຄະດີຕາມຂັ້ຂຕອນກົດໝາຍ.
ຂ່າວ: ນາງ ເກດສະດາພອນ ສີທໍາມະວັນ, Media Laos