ໃນວັນທີ 20 ສິງຫາ 2024 ຜ່ານມາ, ຫາວິທະຍາໄລສະຫວັນນະເຂດ ທີ່ວິທະຍາເຂດໜອງຜື ໄດ້ຈັດພິທີຕັດຫົວບົດສອບເສັງຄັດ ເລືອກເອົານັກຮຽນເຂົ້າສຶກສາຢູ່ ມະຫາວິທະຍາໄລສະຫວັນນະເຂດ ປະຈຳສົກຮຽນ 2024-2025 ໂດຍການເປັນປະທານຕັດຫົວບົດ ສອບເສັງໃນຄັ້ງນີ້ມີທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ແລະ ທ່ານ ຮສ. ປອ ຄູນ ສັກບົວວົງ ອະທິການ ບໍດີມະຫາວິທະຍາໄລສະຫວັນນະເຂດ, ມີຜູ້ຕາງໜ້າຈາກສະຖາບັນ ການສຶກສາຊັ້ນສູງ, ພ້ອມດ້ວຍພະ ນັກງານຄູ-ອາຈານ ແລະ ນັກສອບເສັງເຂົ້າຮ່ວມ.
ໃນນີ້, ມະຫາວິທະຍາໄລສະຫວັນນະເຂດ ມີ 8 ຄະນະວິຊາ, ມີ 46 ຫຼັກສູດທີ່ເປີດການຮຽນ-ການສອນ, ລວມມີ 3 ຫຼັກສູດ ປະລິນຍາໂທ, 37 ຫຼັກສູດປະລິນຍາຕີປົກກະຕິ, 5 ຫຼັກສູດຕໍ່ເນື່ອງ ແລະ 1 ຫຼັກສູດນານາຊາດ, ຫຼັກສູດທັງໝົດແມ່ນຢູ່ພາຍໃຕ້ການ ຊີ້ນຳຂອງກົມການສຶກສາຊັ້ນສູງ ກະຊວງສຶກສາທິການ ແລະ ກິລາ. ສໍາລັບການສອບເສັງຄັດເລືອກ ເອົານັກສຶກສາເຂົ້າສຶກສາຕໍ່ທີ່ ມະຫາວິທະຍາໄລສະຫວັນນະເຂດ ໃນສົກປີ 2024 ຫາ 2025 ນີ້ ໄດ້ແບ່ງສູນສອບເສັງອອກເປັນ 3 ສູນໃຫຍ່ຄື: ສູນສອບເສັງມະຫາ ວິທະຍາໄລສະຫວັນນະເຂດ, ສູນສອບເສັງ ມປາຍ ທ່າແຂກ ແລະ ສູນສອບເສັງເຊໂປນ, ໂດຍມີການກຳນົດເອົາທັງ 3 ສູນການ ສອບເສັງຄັດເລືອກເອົານັກສຶກສາເຂົ້າຮຽນຕໍ່ແມ່ນວັນທີ 20 ສິງ ຫາ 2024 ແຕ່ວ່າໃນການປະຕິບັດ ຕົວຈິງແມ່ນສາມາດປະຕິບັດໄດ້ ແຕ່ສູນດຽວຄື ສູນມະຫາວິທະຍາໄລສະຫວັນນະເຂດ, ສ່ວນສູນອື່ນແມ່ນ ມີຈໍານວນນັກສອບໜ້ອຍ ວິທີແກ້ແມ່ນໄດ້ຈັດສອບແບບອອນລາຍແທນ.
ດ້ານຈໍານວນນັກຮຽນທີ່ສະໝັກສອບເສັງໃນແຕ່ລະສູນມີຈໍາ ນວນທັງໝົດ 329 ຄົນ ຍິງ 199 ຄົນ, ຖ້າປຽບທຽບກັບແຜນຮັບນັກ ສຶກສາປີນີ້ທີ່ກະຊວງອະນຸມັດຈໍາ ນວນ 1,500 ຄົນ, ກວມເອົາພຽງ 22% ແລະຈໍານວນນັກສອບເສັງ ແມ່ນຍັງມີໜ້ອຍເມື່ອປຽບທຽບ ກັບຈໍານວນນັກຮຽນ ມ7 ທີ່ມະຫາວິທະຍາໄລຮັບຜິດຊອບ 3 ແຂວງ ຄື: ແຂວງບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ທີ່ມີຈໍານວນນັກຮຽນທັງໝົດ 9,468 ຄົນ, ແຕ່ມີຜູ້ມາສອບເສັງເຂົ້າຮຽນຕໍ່ ທີ່ມະຫາວິທະຍາໄລສະຫວັນນະເຂດ ມີພຽງ 329 ຄົນ ສະເລ່ຍພຽງ ແຕ່ 3.4% ເທົ່ານັ້ນ.
ທີ່ມາ: ສະຫວັນພັດທະນາ