ຈາກສະພາບຝົນຕົກຕິດຕໍ່ກັນເປັນເວລາຫລາຍວັນເຮັດໃຫ້ນ້ຳຖ້ວມບ້ານເຮືອນທີ່ຢູອາໄສ ແລະ ພື້ນທີ່ທຳການຜະລິດຂອງພໍ່ແມ່ປະຊາຊົນ. ດັ່ງນັ້ນ, ດ້ວຍຄວາມເປັນຫ່ວງເປັນໃຍຈາກການນຳນະຄອນຫຼວງວຽງຈັນ (ນວ) ໃນວັນທີ 28-29 ສິງຫາ 2024 ນີ້, ການນຳນະຄອນຫຼວງວຽງຈັນ ນຳໂດຍ ທ່ານ ສິລິລາດທົງສິນ ທອງເພັງ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງພື້ນທີ່ຕິດຕາມ ແລະ ໃຫ້ທິດຊີ້ນຳໃນການປ້ອງກັນນໍ້າຖ້ວມເຂດທີ່ມີຄວາມສ່ຽງ ຢູ່ເມືອງປາກງື່ມ, ເມືອງສີໂຄດຕະບອງ ແລະ ເມືອງຫາດຊາຍຟອງ.
ໃນວັນທີ 28 ສິງຫາ, ທ່ານ ທະວີໄຊ ເໝົາຊົມພູ ເຈົ້າເມືອງສີໂຄດຕະບອງ ໄດ້ລາຍງານສະພາບນໍ້າຖ້ວມຢູ່ພາຍໃນເມືອງຊອງຕົນເຊິ່ງໄດ້ຮັບຜົນກະທົບຈາກໄພທຳມະຊາດນ້ຳໄຫລຊຸເຂົ້າຖ້ວມເຮືອນປະຊາຊົນ ເຂດບ້ານຕາດທອງ ຈຳນວນໜຶ່ງ ແລະ ຢູ່ບ້ານໜອງດາ ທັງໝົດ 7 ຈຸດ, ມີເຮືອນປະຊາຊົນ ທີ່ໄດ້ຮັບຜົນກະທົບປະມານ 44 ຫຼັງ ແລະ ພື້ນທີ່ທຳການຜະລິດກະສິກຳຈຳນວນໜຶ່ງຖືກນ້ຳຖ້ວມໜັກ, ເຊິ່ງຈຸດທີ່ຖ້ວມໜັກກວ່າໝູ່ແມ່ນຢູ່ບ້ານໜອງດາ ທີ່ໄດ້ເຝົ້າລະວັງເປັນພິເສດ.
ສ່ວນຢູ່ເມືອງຫາດຊາຍຟອງ, ທ່ານ ສຸລິນ ອິນທາທິລາດ ຫົວໜ້າກະສິກໍາປ່າໄມ້ເມືອງ ໃຫ້ຮູ້ໃນວັນທີ 29 ສິງຫາ ນີ້ວ່າ: ປັດຈຸບັນ, ໄດ້ແຈ້ງໃຫ້ພໍ່ແມ່ປະຊາຊົນທີ່ອາໄສຢູ່ນອກເຂດຄູກັນນໍ້າ ກຽມພ້ອມໃນການຍົກຍ້າຍ, ພ້ອມທັງເຝົ້າລະວັງທໍ່ລະບາຍນໍ້າຫ້ວຍຕ່າງໆອອກນໍ້າຂອງ ເພື່ອບໍ່ໃຫ້ນໍ້າຂອງໄຫຼເຂົ້າສູ່ຕົວເມືອງນະຄອນຫລວງວຽງຈັນ ໂດຍຈັດກໍາລັງທະຫານປ້ອງກັນເວັນຍາມຕະຫລອດ 24 ຊົ່ວໂມງ. ຂະນະດຽວກັນ, ກໍໄດ້ຕິດຕັ້ງຈັກສູບນໍ້າ ເພື່ອລະບາຍນໍ້າຕາມຫ້ວຍຕ່າງໆທີ່ມີຄວາມສ່ຽງ ເປັນຕົ້ນ ຢູ່ຫ້ວຍໝາກຮຽວ, ຫ້ວຍເດື່ອ ແລະ ຫ້ວຍວາດ ເເພື່ອກຽມ ພ້ອມເຝົ້າລະວັງນໍ້າຕະຫຼອດເວລາ.
ທ່ານ ສິລິລາດທົງສິນ ທອງເພັງ ໃນນາມຄະນະກຳມະການປ້ອງກັນ ແລະ ຄຸ້ມຄອງໄພພິບັດຂັ້ນ ນວ ໄດ້ຮຽກຮ້ອງໃຫ້ຄະນະຮັບຜິດຊອບຂະແໜງການທີ່ກ່ຽວຂ້ອງເອົາໃຈໃສ່ ສົມທົບກັບຄະນະນຳບ້ານ ແລະ ພໍ່ແມ່ປະຊາຊົນ ເພື່ອເກັບກໍາຂໍ້ມູນຜົນເສຍຫາຍລະອຽດ, ພ້ອມທັງໃຫ້ການຊ່ວຍເຫຼືອປະຊາຊົນໃນທຸກດ້ານ ໂດຍໃຫ້ທຸກພາກສ່ວນລະດົມກຳລັງມາຊ່ວຍເຫຼືອເຄື່ອນຍ້າຍເຄື່ອງຂອງ, ຊັບສິນ ແລະ ປະຊາຊົນອອກຈາກຈຸດນ້ຳຖ້ວມ ເພື່ອຍົກຍ້າຍໄປໄວ້ພື້ນທີ່ສູງ ແລະ ເຂດທີ່ປອດໄພ; ເລັ່ງສູບນ້ຳອອກໄປສູ່ນ້ຳຂອງໃຫ້ຫຼຸດລົງໂດຍໄວ.
ພ້ອມນີ້, ທ່ານ ຮອງເຈົ້າຄອງ ນວ ພ້ອມຄະນະຍັງໄດ້ມອບເງິນຊ່ວຍເຫລືອນໍ້າຖ້ວມໃຫ້ແກ່ບ້ານ ໜອງດາ ຈຳນວນ 30 ລ້ານກີບ, ໃຫ້ເມືອງສີໂຄດຕະບອງ 100 ລ້ານກີບ , ເມືອງຫາດຊາຍຟອງ 30 ລ້ານກີບ, ເມືອງປາກງື່ມ 30 ລ້ານກີບ ແລະ ບ້ານໝາກຮຽວ 10 ລ້ານກີບ.
ຂ່າວ: ວສລ