ໃນຕອນບ່າຍວັນທີ 28 ສິງຫາ 2024, ທີ່ ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ດາໂຕະ ເອີຣິວັນ ເປຮິນ ຢູສອບ (Hon. Dato Erywan Pehin Yusof) ລັດຖະມົນຕີກະຊວງການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູຊາລາມ ແລະ ຄະນະ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມຄະນະກໍາມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ບຣູໄນ ຄັ້ງທີ 4 ໃນວັນທີ 28-29 ສິງຫາ 2024.
ໃນໂອກາດນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ຄັ້ງນີ້ ເຊິ່ງຖືເປັນຂີດໝາຍສໍາຄັນສໍາລັບການພົວພັນ ແລະ ການຮ່ວມມືຢ່າງໃກ້ຊິດ ກໍຄື ໄມຕີຈິດມິດຕະພາບທີ່ດີ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ໃນຖານະທີ່ເປັນ “ຄູ່ຮ່ວມຍຸດທະສາດ”. ພ້ອມນີ້, ທ່ານ ນາຍົກລັດຖະມົນຕີໄດ້ຝາກຄວາມຢື້ຢາມຖາມຂ່າວອັນອົບອຸ່ນໄປຍັງ ສົມເດັດ ຊຸນຕານ ຮາຈິ ຮັດຊານານ ໂບນເກຍ (His Majesty Sultan Haji Hassanal Bolkiah) ແຫ່ງບຣູໄນ ດາຣູຊາລາມ ແລະ ສະແດງຄວາມຊົມເຊີຍວັນຄ້າຍວັນພະຣາຊະສົມພົບ ຂອງ ສົມເດັດ ຊຸນຕານ ແຫ່ງ ບຣູໄນ ດາຣູຊາລາມ ຄົບຮອບ 78 ພັນສາ ໃນເດືອນກໍລະກົດ 2024 ຜ່ານມາ.
ທ່ານຍັງໄດ້ສະແດງຄວາມປິຕິຍິນດີທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນເຕັມໄປດ້ວຍໝາກຜົນ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ຕະຫຼອດໄລຍະ 3 ທົດສະວັດທີ່ຜ່ານມາ ໄດ້ຮັບການພັດທະນາຢ່າງຕໍ່ເນື່ອງ ແລະ ແໜ້ນແຟ້ນຍິ່ງໆຂຶ້ນ, ພ້ອມທັງໄດ້ສະແດງຄວາມຊົມເຊີຍຕໍ່ຜົນສໍາເລັດຂອງການປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມືສອງຝ່າຍ ລາວ-ບຣູໄນ ຄັ້ງທີ 4 (JCBC-4) ທີ່ໄດ້ຈັດຂຶ້ນໃນວັນທີ 28 ສິງຫານີ້ ຢູ່ ນະຄອນຫຼວງວຽງຈັນ ແລະ ຍັງໄດ້ຊຸກຍູ້ໃຫ້ສອງກະຊວງການຕ່າງປະເທດ ລາວ ແລະ ບຣູໄນ ສືບຕໍ່ປະສານສົມທົບກັນຢ່າງໃກ້ຊິດ ເພື່ອຊຸກຍູ້ປະຕິບັດບັນດາແຜນງານຂອງສອງລັດຖະບານ ລາວ ແລະ ບຣູໄນ ໃຫ້ສໍາເລັດຜົນຄື: ສົ່ງເສີມການຮ່ວມມືທາງດ້ານການພັດທະນາຊັບພະຍາກອນມະນຸດ, ເສດຖະກິດ, ການຄ້າ, ພະລັງງານ, ການກະສິກໍາ, ການທ່ອງທ່ຽວ.
ໃນຕອນທ້າຍ, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ມາຍັງ ລັດຖະບານ ແລະ ປະຊາຊົນບຣູໄນ ທີ່ໄດ້ໃຫ້ການສະໜັບສະໜູນ ແລະ ຮ່ວມມືຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະ ການເປັນປະທານອາຊຽນ 2024 ຂອງ ສປປ ລາວ.
ໃນຂະນະດຽວກັນ, ທ່ານ ດາໂຕະ ເອີຣິວານ ເປຮິນ ຢູສອບ ລັດຖະມົນຕີກະຊວງການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູຊາລາມ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ລາຍງານຜົນການພົບປະກັບຄູ່ຮ່ວມຕໍາແໜ່ງຝ່າຍລາວ ກໍຄື ຜົນຂອງກອງປະຊຸມ JCBC-4, ພ້ອມທັງໄດ້ຢືນຢັນຄວາມໝາຍໝັ້ນຂອງຕົນໃນການຮັດວຽກຮ່ວມກັບຄູ່ຮ່ວມຕໍາແໜ່ງຝ່າຍລາວຢ່າງໃກ້ຊິດ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ່ ກໍຄື ການເປັນຄູ່ຮ່ວມຍຸດທະສາດ ລະຫວ່າງ ບຣູໄນ ດາຣູຊາລາມ ແລະ ສປປ ລາວ ທີ່ໄດ້ຮັບການຍົກລະດັບໃນເດືອນຕຸລາ 2023 ຜ່ານມາ ໃຫ້ມີບາດກ້າວຂະຫຍາຍຕົວໃນຕໍ່ໜ້າ.
ຂ່າວ: ວສລ