ສຳນັກຂ່າວຕ່າງປະເທດລາຍງານໃນວັນທີ 21 ສິງຫາ 2024 ຜ່ານມາ, ເຈົ້າໜ້າທີ່ຕຳຫຼວດ ແລະ ຊາວບ້ານໃນພຶ້ນທີ່ໄດ້ເປີດເຜີຍເຖິງເຫດການສະຫຼົດ ເມື່ອຍິງຊາວອິນໂດເນເຊຍຊື່ວ່ານາງ ຮາລິມາ ຮາຫັກບໍອາຍຸ ອາຍຸ 54 ປີ ຖືກແຂ້ໃຫຍ່ທີ່ມີຄວາມຍາວ 4 ແມັດ ກັດຈົນເສຍຊີວິດ ຂະນະທີ່ເຫຍື່ອລົງໄປອາບນ້ຳໃນແມ່ນ້ຳທີ່ໝູ່ບ້ານວາລີ ເທິງເກາະມາລູກູ ປະເທດອິນໂດເນເຊຍ.
ຕາມການລາຍງານໄດ້ແຈ້ງວ່າ: ເຫຍື່ອລາຍດັ່ງກ່າວໄດ້ລົງໄປອາບນ້ຳ ຫຼັງຈາກການຫາຫອຍແລ້ວໃນວັນທີ 20 ສິງຫາ 2024 ຫຼັງຈາກນັ້ນກໍຫາຍຕົວໄປ ພີ່ນ້ອງ ແລະ ໝູ່ຄູ່ກໍໄດ້ເລີ່ມພາກັນອອກຕາມຫາແຕ່ກໍບໍ່ພົບ ຈົນຊາວບ້ານມາພົບເກີບ ແລະ ຊິ້ນສ່ວນສ່ວນມະນຸດຢູ່ໃນແມ່ນ້ຳຈຶ່ງໂທແຈ້ງເຈົ້າໜ້າທີ່ຕຳຫຼວດຄາດວ່າຖືກແຂ້ກິນ ທາງເຈົ້າໜ້າທີ່ ແລະ ຊາວບ້ານຈຶ່ງອອກຕາມຫາແຂ້ໂຕດັ່ງກ່າວຈົນພົບ ແລະ ໄດ້ຂ້າມັນທັນທີ ຫຼັງຈາກນັ້ນກໍໄດ້ຜ່າເບິ່ງທ້ອງຂອງມັນຈຶ່ງພົບຊິ້ນສ່ວນຂອງຍິງຄົນດັ່ງກ່າວ ຊາວບ້ານໄດ້ເລົ່າວ່າແຂ້ໂຕນີ້ມີຂະໜາດທີ່ໃຫຍ່ ແຕ່ບໍ່ມີໃຜສາມາດລະບຸໄດ້ວ່າເປັນສາຍພັນໃດ.
ທັງນີ້ປະເທດອິນໂດເນເຊຍ ເປັນປະເທດທີ່ມີສັດໃຫຍ່ເຊັ່ນ: ງູເຫຼືອມ, ແຂ້ ຈຶ່ງເກີດເຫດການການເສຍຊີວິດແບບນີ້ຂຶ້ນຫຼາຍ.