ວັນທີ 20 ສິງຫາ 2024, ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຫົວພັນ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ມີການມົ້ວສຸມຄ້າ-ຂາຍຢາເສບຕິດ ຢູ່ຈຸດບ້ານນາລີວ, ເມືອງຊຳເໜືອ, ແຂວງຫົວພັນ.
ເຈົ້າໜ້າທີ່ ຈຶ່ງໄດ້ແຕ່ງຕັ້ງໜ່ວຍງານວິຊາສະເພາະ ລົງຕິດຕາມກວດກາເຫັນວ່າມີມູນຄວາມຈິງ, ມາຮອດເວລາປະມານ 11 ໂມງຂອງວັນດຽວກັນ, ເຈົ້າໜ້າທີ່ຈຶ່ງໄດ້ເຂົ້າກັກຕົວເປົ້າໝາຍ ພ້ອມທັງກວດຄົ້ນເຄຫາສະຖານ, ພົບເຫັນຂອງກາງຢາບ້າຈຳນວນ 22 ຖົງກັບ 119 ເມັດ, ລວມທັງໝົດ 4,519 ເມັດ, ຢາເຮໂຣອິນ 1 ຫໍ່ນ້ອຍ, ເງິນ 13,000,000 ກີບ, ໂທລະສັບ 3 ເຄື່ອງ, ເລົາປືນແກັບ 2 ເລົາ, ອຸປະກອນຍິງປືນແກັບ 1 ຊຸດ.
ຈາກນັ້ນ, ເຈົ້າໜ້າທີ່ຈຶ່ງໄດ້ນໍາຕົວຜູ້ກ່ຽວມາສືບສວນ ຈຶ່ງຮູ້ວ່າ: ຜູ້ກ່ຽວຊື່ ທ້າວ ເລັ່ງເຮີ ອາຍຸ 51 ປີ, ຢູ່ບ້ານນາລີວ, ເມືອງຊຳເໜືອ, ແຂວງຫົວພັນ. ຕໍ່ກັບຄະດີດັ່ງກ່າວ, ແມ່ນຢູ່ໃນຂັ້ນຕອນການສືບສວນ-ສອບສວນ ຂອງເຈົ້າໜ້າທີ່ວິຊາສະເພາະ ເພື່ອຂະຫຍາຍຜົນຫາຜູ້ຮ່ວມຂະບວນການມາດຳເນີນຄະດີ ຕາມຂັ້ນຕອນຂອງກົດໝາຍ.
ຂ່າວ: ປກສ ແຂວງຫົວພັນ