ສາຍຝົນ ແຫ້ວຫານາມ ນັກກິລາເຕະບານຕຳແໜ່ງກອງກາງ ທີມຊາດລາວ, ອາຍຸ 18 ປີ, ໄດ້ລົງຫຼີ້ນ ໄທລີກ 2 ເປັນທີ່ແນ່ນອນ ແລ້ວ, ຫຼັງຈາກສະໂມສອນ ສຸພັນບຸລີ ປະກາດລາຍຊື່ນັກກິລາໄທລີກ 2 ລະດູການ 2024-2025 ບັນລຸຂໍ້ຕົກລົງ ຍ້າຍຈາກ ນົນທະບູລີ ເອຟຊີ ໄທລີກ 3 ສູ່ ສະໂມສອນ ສຸພັນບູລີ ເອັຟຊີ Suphanburi FC ໄທລີກ 2 ປະເທດໄທ ລະດູການ 2024/25.
ສາຍຝົນ ໄດ້ກ່າວວ່າ: ຮູ້ສຶກດີໃຈທີ່ໄດ້ຫຼິ້ນໃຫ້ທີມ ສຸພັນບູລີ ເພາະວ່າ: ສະໂມສອນ ສຸພັນບູລີ ເປັນທີມທີ່ດີ ເເລະ ເປັນທີມທີ່ມີຊື່ສຽງ, ຕົນເອງກໍມີຄວາມໄຝ່ຝັນຢາກມາຫຼີ້ນກັບທິມດັ່ງກ່າວນີ້ຕັ້ງແຕ່ຍັງນ້ອຍ, ຖືວ່າເປັນໂອກາດ ເເລະ ເປັນການເລີ່ມຕົ້ນທີ່ດີສຳລັບໂຕຂ້ອຍເອງ.
ສຳລັບປະຫວັດຂອງ ສາຍຝົນ ເຄີຍຝຶກຊ້ອມຢູ່ ສະໂມສອນ ເອສະຣາ ຕັ້ງແຕ່ຍັງນ້ອຍ, ຫຼັງຈາກນັ້ນໄດ້ມີໂອກາດໄປຄັດໂຕກັບ ອາຄາເດີມີ ສະໝຸຍ ເປັນທີມທີ່ສ້າງໃໝ່ໃນຕອນນັ້ນ ແລະ ໄດ້ໄປຝຶກຊ້ອມຢູ່ເກາະສະໝຸຍ 3 ປີ.
ຫຼັງຈາກນັ້ນໄດ້ຍ້າຍມາຢູ່ ອະຄາເດີມີ ນົນທະບູລີ 1 ປີ ເເລະ ຍ້າຍມາຢູ່ ອະຄາເດີມີ ຫົວຫີນ 1 ປີ ແລະ ຍ້າຍມາຮ່ວມ ສະໂມສອນ ສຸພັນບູລີ ໄທລີກ 2 ໃນປັດຈຸບັນ, ສ່ວນຜົນງານລະດັບທີມຊາດລາວ ແມ່ນຫຼິ້ນໃຫ້ກັບ ທີມຊາດລາວ ຢູ16, ຢູ17, ຢູ19 ແລະ ຢູ20.
ໃນລະດູການ 2024-2025 ມີນັກເຕະລາວທີ່ ຫຼິ້ນໃຫ້ກັບ ສະໂມສອນ ຈາກໄທ 3 ຄົນຄື: ສຸກອາພອນ ວົງຈຽງຄຳ ຫລິ້ນໃຫ້ກັບ ສະໂມສອນ ນະຄອນສີ ໄທລີກ 2 , ມິດສະດາ ສາຍໃຕ້ຟ້າ ຫຼິ້ນໃຫ້ກັບ ສະໂມສອນ ເມືອງເລີຍ ໄທລີກ 3 ແລະ ສາຍຝົນ ແກ້ວຫານາມ ຫຼິ້ນໃຫ້ກັບ ສຸພັນບູລີ ໄທລີກ 2.
ຂ່າວ-ພາບ: ສຕລ