ອົ້ນ ພົມມະວົງ ສະກັອກກິ້ນ ຍິງລາວຄົນທໍາອິດ ທີ່ສາມາດຄວ້າແຊ້ມໂລກ ກິລາດິສກັອຟ (Disc Golf) ຫລ້າສຸດໄດ້ແຊ້ມລາຍການ LWS Open at Idlewild presented by Dynamic Discs & The Nati ເປັນລາຍການໃຫຍ່ລະດັບອາຊີບ Pro Tour Elite Series ແຂ່ງຂັນລະຫວ່າງວັນທີ 9-11 ສິງຫາ 2024 ທີ່ Burlington ລັດ Kentucky ສະຫະລັດ ອາເມຣິກາ ໂດຍມີນັກກິລາ 44 ຄົນ ທີ່ຜ່ານການຄັດເລືອກເຂົ້າຮ່ວມ.
ສຳລັບຜົນງານ 3 ວັນ ຂອງ ອົ້ນ ພົມມະວົງ ສະກັອກກິ້ນ ເກັບໄດ້ -10 ອັນເດີພາຣ ເອົາຊະນະ ນາຕາລີ ໄຣອັ້ນ ຈາກອາເມຣິກາ 4 ສະໂຕຣກ ຮັບຂັນແຊ້ມ ພ້ອມເງິນລາງວັນ 8,000 ໂດລາສະຫະລັດ ບວກໂບນັສອີກ 4,000 ໂດລາ ລວມ 12,000 ໂດລາ.
ປີ 2024 ອົ້ນ ພົມມະວົງ ສະກັອກກິ້ນ ໄດ້ທີ 1 ມາແລ້ວ 7 ລາຍການ ຈາກການເຂົ້າຮ່ວມ 26 ລາຍການ ສ່ວນທີ່ເຫຼືອສາມາດຈົບອັນດັບ 1 ໃນ 10 ສະສົມເງິນລາງວັນ 54,379 ໂດລາ.
ອົ້ນ ພົມມະວົງ ສະກັອກກິ້ນ ເຄີຍໄດ້ແຊ້ມໂລກມາແລ້ວ ເມື່ອປີ 2022, ກ່ອນໜ້ານີ້ ອົ້ນ ໄດ້ສ້າງສະຖິຕິໂລກ ເປັນນັກກິລາຄົນທີສອງ ສາມາດຄວ້າແຊ້ມໂລກ ດິສກັອຟ ຮຸ່ນອາຍຸ 40 ປີຂຶ້ນໄປ 3 ປີຕິດຕໍ່ກັນ 2021-2023 ຕໍ່ຈາກ Anni Kreml ຊາວອາເມຣິກາ ໃນປີ 2005-2007.
ທ່ານ ນາງ ອົ້ນ ພົມມະວົງ ສະກັອກກິ້ນ ເປັນຄົນລາວແທ້ ຍ້າຍໄປຢູ່ກັບສາມີຢູ່ອາເມຣິກາ ທີ່ເປັນນັກກິລາດິສກັອຟ ໃນປີ 2009 ກໍເລີ່ມສຶກສາຮຽນຮູ້ ແລະ ຝຶກຝົນຫລິ້ນກິລາປະເພດນີ້ ແລະ ເລີ່ມຕົ້ນອາຊີບໃນປີ 2011 ລົງແຂ່ງຂັນມາແລ້ວ 210 ລາຍການ ສາມາດພິຊິດແຊ້ມໄດ້ 98 ລາຍການ ຈາກຜົນງານພົ້ນເດັ່ນທັງໃນ ແລະ ນອກສະໜາມ ເຮັດໃຫ້ ອົ້ນ ພົມມະວົງ ສະກັອກກິ້ນ ຖືກບັນຈຸລາຍຊື່ເຂົ້າຫໍກຽດຕິຍົດ ຫຼື Hall of Fame ຂອງກິລາປະເພດນີ້.
ຂໍຂອບໃຈຂໍ້ມູນຈາກ: ຂ່າວກິລາ Lao National TV