ດ່ານສາກົນນໍ້າເງິນເມືອງເງິນແຂວງໄຊຍະບູລີໄດ້ຍົກລະດັບຈາກດ່ານພາສີທ້ອງຖິ່ນຂຶ້ນເປັນດ່ານສາກົນໃນວັນທີ 21 ທັນວາ 2008 ໃນປີ 2024 ນີ້ ການຈັດຕັ້ງປະຕິບັດແຜນງົບປະມານດ່ານພາສີສາກົນນໍ້າເງິນຍັງພົບຄວາມຫຍຸ້ງຍາກທາງດ້ານການເງິນ ແລະ ເສດຖະກິດເຮັດໃຫ້ເສດຖະກິດສະລໍຕົວລາຄານໍ້າມັນ ແລະ ອາຍແກັດທີ່ມີການເພິ່ມຂຶ້ນການແລກປ່ຽນເງິນຕາມີການເໜັງຕິງ ບັນຫາເງິນເຟີ້ຍັງສຶບຕໍ່ໄປແຕ່ລະໄລຍະເຮັດໃຫ້ມີການເພິ່ມຄ່າໃຊ້ຈ່າຍຫຼາຍຂຶ້ນບວກໃສ່ທ່າອ່ຽງການນໍາເຂົ້າສິນຄ້າໝວດຕ່າງໆ ຫຼຸດລົງໂດຍສະເພາະແມ່ນນໍ້າມັນເຊື້ອໄຟຊຶ່ງເປັນລາຍໄດ້ຕົ້ນຕໍຂອງດ່ານເຖິ່ງຢ່າງໃດກໍ່ຕາມບັນຫາທີ່ກ່າວມານັ້ນກໍ່ບໍ່ໄດ້ເປັນອຸປະສັກຕໍ່ການເກັບລາຍຮັບຂອງພວກເຮົາຍ້ອນພວກເຮົາໄດ້ຮັບການນໍາພາຊີ້ນໍາຈາກຄະນະພັກກົມພາສີ, ຄະນະນໍາພາສີປະຈໍາແຂວງ ແລະ ອໍານາດການປົກຄອງທ້ອງຖິ່ນບວກໃສ່ຄວາມເອົາໃຈໃສ່ຢ່າງຕັ້ງໜ້າຂອງຄະນະດ່ານ ແລະ ພະນັກງານວິຊາການທຸກຄົນຈຶ່ງເຮັດໃຫ້ການຈັດຕັ້ງປະຕິບັດວຽກງານຕ່າງໆໄດ້ດີພໍສົມຄວນ.
ທ່ານ ຕຸ້ຍ ຄໍາວັນດີ ຫົວໜ້າດ່ານພາສີສາກົນນໍ້າເງິນ ກ່າວວ່າ: ດ່ານພາສິສາກົນນໍ້າເງິນປະກອບມີພະນັກງານທັງໝົດ 11 ຄົນ ຍິງ 1 ຄົນ ມີຄະນະດ່ານ 4 ທ່ານ ຫົວໜ້າດ່ານ 1 ທ່ານ ຮອງ 3 ທ່ານ ມີພະນັກງານສົມບູນ 8 ຄົນ ຍິງ 1 ຄົນ ແລະ ພະນັກງານຊ່ວຍວຽກ 3 ຄົນ ດ່ານພາສີສາກົນນໍ້າເງິນຂຶ້ນກັບພາສີປະຈໍາແຂວງ ແລະ ກົມພາສີປະກອບມີ 3 ກຸ່ມວຽກໃຫຍ່ທີ່ຂຶ້ນກັບຄື: ກຸ່ມວຽກບໍລິຫານ ແລະ ຄຸ້ມຄອງຂັ້ນຕອນການແຈ້ງພາສີ, ກຸ່ມວຽກກວດກາສິນຄ້າ ແລະ ຄຸ້ມຄອງສາງ ແລະ ກຸ່ມວຽກກວດກາພາຫະນະ ແລະ ຜູ້ໂດຍສານສະເພາະແຜນການຈັດເກັບລາຍຮັບໃນປີ 2024 ຢູ່ດ່ານພາສີສາກົນນໍ້າເງິນມີທັງໝົດ 703 ຕື້ກວ່າກີບ ຜ່ານການຈັດເກັບລາຍຮັບໃນ 6 ເດືອນຕົ້ນປີ ແມ່ນຈັດເກັບໄດ້ທັງໝົດ 358 ຕື້ກວ່າກີບ ເທົ່າກັບ 50,95% ຂອງແຜນການປີ ລາຍຮັບຕົ້ນຕໍຂອງດ່ານແມ່ນການນໍາເຂົ້ານໍ້າມັນເຊື້ອໄຟກວມເຖິງ 95,88% ຂອງລາຍຮັບທັງໝົດເພາະວ່າບໍລິສັດນໍາເຂົ້ານໍ້າມັນເຊື້ອໄຟເຂົ້າພາຍໃນດ່ານພາສີສາກົນນໍ້າເງິນມີຈໍານວນ 6 ບໍລິສັດ.
ແຫຼ່ງຂ່າວ: News.XBL