ສປປ ລາວ ຈະສົ່ງ ທ້າວ ແກ່ນ ເທບທິດາ ນັກກິລາ ແລ່ນ-ລານ ປະເພດເຕັ້ນຍາວຊາຍ ທີ່ຜ່ານການຄັດເລືອກລະດັບສາກົນ ໜຶ່ງດຽວຄວາມຫວັງຂອງທັບນັກກິລາຄົນພິການລາວ ເຂົ້າຮ່ວມງານແຂ່ງຂັນກິລາພາຣາລິມປິກເກມ ຄັ້ງທີ 17 ທີ່ປະເທດຝຣັ່ງ, ຮັບກຽດເປັນເຈົ້າພາບ ຈະຈັດຂຶ້ນ ໃນລະຫວ່າງວັນທີ 28 ສິງຫາ ຫາ ວັນທີ 8 ກັນຍາ 2024 ນີ້.
ພິທີຖະແຫຼງຂ່າວ ໄດ້ຈັດຂຶ້ນ ໃນວັນທີ 6 ສິງຫາ ຜ່ານມາ ໂດຍທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງປະທານ-ເລຂາທິການ ຄະນະກຳມະການພາຣາແລມປິກແຫ່ງຊາດລາວ ຫຼື ຄພລ ໃຫ້ສຳພາດວ່າ: ໃນການກະກຽມເຂົ້າຮ່ວມງານແຂ່ງຂັນກິລາພາຣາແລມປິກເກມ ຄັ້ງທີ 17 ທີ່ນະຄອນຫຼວງ ປາຣີ, ປະເທດຝຣັ່ງ.
ທາງ ຄພລ ພວກເຮົາໄດ້ມີການຂຶ້ນແຜນ ແລະ ຫ້າງຫາກະກຽມຄວາມພ້ອມວຽກຕ່າງໆ, ໂດຍສະເພາະໄດ້ສຳເລັດການລົງທະບຽນຈຳນວນຄະນະນຳ, ຄູຝຶກ ແລະ ນັກກິລາ ແລະ ຖືກຮັບຮອງຜົນການລົງທະບຽນ ເປັນທາງການ ໂດຍມີຄູຝຶກ 1 ຄົນ ແລະ ນັກກິລາກິລາແລ່ນ-ລານຄົນພິການ 1 ຄົນ. ເຊິ່ງຈະໄດ້ອອກເດີນທາງ ວັນທີ 24 ສິງຫາ 2024, ເພື່ອເຂົ້າຮ່ວມແຂ່ງຂັນ ໃນທີ 9 ກັນຍາ 2024.
ທ້າວ ແກ່ນ ເທບທິດາ ກໍໃຫ້ສຳພາດວ່າ: ໃນການເຂົ້າຮ່ວມງານຄັ້ງນີ້ ແມ່ນໄດ້ຮັບໂຄຕ້າ ແລະ ຖືກຮັບຮອງຈາກສາກົນ ໃຫ້ໄດ້ເຂົ້າຮ່ວມແຂ່ງຂັນໃນລາຍການເຕັ້ນຍາວ ແລະ ໄດ້ຮັບການຝຶກຊ້ອມຈາກທ່ານ ຮາເນະ ຮີໂຣະຢູກິ ຄູຝຶກຊາວຍີ່ປຸ່ນ, ໂດຍລວມແລ້ວ ທັງສະພາບຮ່າງກາຍ ແລະ ຈິດໃຈມີຄວາມພ້ອມເກືອບຮ້ອຍເປີເຊັນແລ້ວ ຊຶ່ງໄດ້ມີການເກັບຕົວຝຶກຊ້ອມຢ່າງຕໍ່ເນື່ອງຫຼັງຈາກໄດ້ເຂົ້າຮ່ວມແຂ່ງຂັນຊີງແຊ໋ມໂລກມາແຕ່ເດືອນມິຖຸນາ ຜ່ານມາ ຍັງເຫຼືອພຽງແຕ່ໄປປັບສະພາບອາກາດຢູ່ທີ່ປະເທດຝຣັ່ງ.
ງານດັ່ງກ່າວ ເປັນສິ່ງທ້າທ່າຍຫຼາຍ ເພາະເຮົາເຄີຍຝຶກຊ້ອມແລ່ນ ໄລຍະ 100 ແມັດຊາຍມາແຕ່ປີ 2015 ແລະ ກໍໄດ້ຝຶກຊ້ອມເຕັ້ນຍາວມາແດ່, ແຕ່ຍ້ອນເກີດອຸບັດເຫດຂໍ່ຕີນພີກກໍໄດ້ເຊົ່າ ແລະ ກໍໄດ້ກັບມາ ຝຶກຊ້ອມອີກຄັ້ງໜຶ່ງໃນປີ 2023 ໃນງານກິລາອາຊຽນພາຣາເກມ ແລະ ກໍມີຜົນງານຍາດໄດ້ຫຼຽນທອງ, ຫາກທຽບໃສ່ສະຖິຕິໂລກ ທີ່ນັກກິລາຂອງປະເທດຄິວບາ ເຮັດໄດ້ 7,41 ແມັດແຕ່ປີ 2012.
ແຕ່ຂອງນ້ອງເຮັດໄດ້ປັດຈຸບັນ 6,06 ແມັດ, ແຕ່ສະຖິຕິຕົວຈິງຂອງຄູ່ແຂ່ງຂັນໃນລາຍການນີ້ ກໍບໍ່ແຕກຕ່າງກັນຫຼາຍ, ສະນັ້ນ, ກໍພໍມີໂອກາດ ສຳລັບນ້ອງແລ້ວເຮັດເພື່ອຜົນງານໃຫ້ແກ່ປະເທດຊາດ ຈະສຸມທຸກຄວາມສາມາດ, ເພື່ອຍາດໃຫ້ໄດ້ໄຊຊະນະໃຫ້ປະຊາຊົນລາວໄດ້ພາກພູມໃຈ.
ພາບ-ຂ່າວໂດຍ: ສົງການ ພັນແພງດີ, ໜັງສືພິມສຶກສາ ວິທະຍາສາດ ແລະ ກິລາ ອອນລາຍ