WIG ທີມຫຼານນ້ອຍເຍົາວະຊົນລາວສ້າງຜົນງານໂດດເດັ່ນ ລົງສະໜາມ 2 ນັດຖະຫຼົ່ມຄູ່ແຂ່ງຂາດລອຍ ໃນການແຂ່ງຂັນ ລາຍການ PANYI EITE CUP 2024 ລຸ້ນອາຍຸບໍ່ເກີນ 10 ປີ ທີ່ນະຄອນເຊຍແມນນ ແຂວງຟູຈຽນ ສປ ຈີນ ໃນລະຫວ່າງວັນທີ 5-11 ສິງຫາ 2024.

ສຳລັບຜົນງານທີມ WIG NAGA ເຍົາວະຊົນລາວລົງແຂ່ງ 2 ນັດໃນວັນທີ 6 ສິງຫາ 2024 ສາມາດເອົາຊະນະ SCHOOL MUSIC XIAMEN ແບບຂາດລອຍ 12-0 ປະຕູ, ໃນນັດທີ 2 ຖະຫຼົ່ມ JIANGYIN 21-0 ປະຕູ, ເຊິ່ງ 2 ນັດທຳອິດທີ່ນັກເຕະນັ້ນສາມາດເຮັດປະຕູໄດ້ຫຼາຍທີ່ສຸດກໍຄື ອານຸສັກ ວິໄລກຸນ ໝາຍເລກ 10 ຍິງໄປແລ້ວ 10 ກວ່າປະຕູຈາກ 2 ນັດ, ສ່ວນນັດທີ 3 ພົບກັບ JINSHAN ແຂ່ງໃນວັນທີ 7 ສິງຫາ 2024 ເວລາ 16:50 ໂມງ (ຕາມເວລາລາວ).

ໃນການແຂ່ງຂັນ ລາຍການ PANYI EITE CUP 2024 ມີຫຼາຍລຸ້ນທີ່ເຂົ້າຮ່ວມປະກອບມີ: ຢູ8, ຢູ10 ແລະ ຢູ 12 ແຂ່ງ 7 ຮັບ 1 ໂດຍມີ 268 ທີມເຂົ້າຮ່ວມຈາກຫຼາຍປະເທດຄື: ສປ ຈີນ(ເຈົ້າພາບ), ຍີ່ປຸ່ນ, ເກົາຫຼີ, ໄທ ແລະ ລາວ ໂດຍເຈົ້າພາບໄດ້ເຊີນທີມຈາກອາຊີຈຳນວນ 64 ທີມ ສ່ວນທີ່ເຫຼືອແມ່ນທີມຈາກ ສປ ຈີນ.

ຂໍ້ມູນຈາກ: ຂ່າວເສດຖະກິດ-ການຄ້າ