ທ່ານ ນາງ ສຸລິລັກ ຄຳວົງສາ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງຫົວພັນລາຍງານຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງຫົວພັນ ຊຸດທີ II ໃນວັນ ທີ 31 ກໍລະກົດ 2024 ວ່າ: ປັດຈຸບັນ ທົ່ວແຂວງຫົວພັນ ມີຄອບຄົວພົ້ນທຸກທັງໝົດ 25.580 ຄອບຄົວ ກວມ 47,63% ແຕ່ຄອບຄົວທຸກຍາກ ຍັງກວມສ່ວນຫຼາຍ ມີ 28.128 ຄອບຄົວ ເທົ່າກັບ 52,37% ຂອງຄອບຄົວທັງໝົດທົ່ວແຂວງ.
ໃນນັ້ນ, ມີຄອບຄົວພັດທະນາ 12.269 ຄອບຄົວ ກວມ 22,84%, ມີບ້ານພົ້ນທຸກ 233 ບ້ານ ກວມ 32,18%, ຍັງມີບ້ານທຸກຍາກຈໍານວນ 491 ບ້ານ ກວມ 67,82% ແລະ ມີເມືອງທຸກຍາກ 10 ເມືອງ ກວມ 100% ຂອງຈໍານວນເມືອງທັງໝົດ.
ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ປະຈໍາ 06 ເດືອນຕົ້ນປີ 2024 ຜ່ານມາ ໄດ້ຈັດສັນບັນດາທຶນຮອນໃສ່ 07 ຈຸດສຸມພັດທະນາຄື: ກຸ່ມສະເຫຼີຍ, ກຸ່ມພັນລໍ, ກຸ່ມເມືອງບໍ່, ກຸ່ມສົບເລົ້າ, ກຸ່ມສົບຮາວ, ກຸ່ມນາໜັງ ແລະ ຈຸດສຸມເມືອງເປີ້ ເຊິ່ງໂຄງການທີ່ມີມູນຄ່າຫລາຍກວ່າ 20 ຕື້ກີບ ມີ 4 ໂຄງການ ລວມມູນຄ່າທັງໝົດ 118,5 ຕື້ກັບ, ໂຄງການທີ່ມີມູນຄ່າຕໍ່າກວ່າ 20 ຕື້ກີບມີ 24 ໂຄງການ ລວມມູນຄ່າ 94,45 ຕື້ກີບ; ທຶນພັດທະນາຊົນນະບົດ (ເປົ້າໝາຍສະເພາະ) 2 ໂຄງການ ລວມມູນຄ່າ 90,83 ຕື້ກີບ.
ພ້ອມນັ້ນ, ໄດ້ສຸມໃສ່ຈັດສັນພູມລໍາເນົາ ແລະ ບ່ອນທຳມາຫາກິນຖາວອນໃຫ້ປະຊາຊົນ ຈຳນວນ 06 ຈຸດສຸມຄື: ກຸ່ມເມືອງແວ່ນ, ກຸ່ມໂສຍ, ກຸ່ມປານ, ກຸ່ມວຽງພັນ, ບ້ານເມືອງພັດ ແລະ ກຸ່ມເມືອງຊືມ, ນອກຈາກຈຸດສຸມດັ່ງກ່າວນີ້ຍັງໄດ້ສຸມເຂົ້າໃສ່ຈຸດທີ່ມີບັນຫາການຍົກຍ້າຍຂອງພົນລະເມືອງແບບຊະຊາຍ, ເຂດລຽບຕາມຊາຍແດນ ເພື່ອແກ້ໄຂເຮັດໃຫ້ເກີດມີຄວາມສະຫງົບ ອຸ່ນອ່ຽນໃນການດໍາລົງຊີວິດ ແລະ ທຳມາຫາກິນ, ມີຄວາມສາມັກຄີປອງດອງ, ເຄົາລົບກົດໝາຍບ້ານເມືອງ ແລະ ສິ່ງແວດລ້ອມໄດ້ຮັບການປົກປັກຮັກສານໍາໃຊ້ແບບຍືນຍົງ.
ນອກນັ້ນ, ໄດ້ສຸມໃສ່ຮ່ວງທຶນພັດທະນາຊົນນະບົດ ແລະ ແກ້ໄຂຄວາມທຸກຍາກ ຂັ້ນສູນກາງຄຸ້ມຄອງ ເຊີ່ງມີ: ຮ່ວງທຶນພັດທະນາຊົນນະບົດ ຈຳນວນ 2 ກຸ່ມບ້ານ: ກຸ່ມບ້ານພຽງສາ ແລະ ກຸ່ມບ້ານປ່າຮ່າງ ເຊິ່ງເປັນຈຸດສຸມທີ່ນອນຢູ່ໃນ 20 ຈຸດສຸມຂອງສູນກາງ ລວມມີ 07 ໂຄງການ ລວມມູນຄ່າ 99.75 ຕື້ກີບ; ຮ່ວງທຶນຈັດສັນພູມລຳເນົາ ແລະ ບ່ອນທຳມາຫາກິນຖາວອນ 3 ໂຄງການ ມູນຄ່າ 6,98 ຕື້ກີບ. ກອງທຶນພັດທະນາ 3 ຈຸດສຸມຊາຍແດນລາວ- ຫວຽດນາມ ຄື: ຈຸດສຸມຫ້ວຍມ້າ-ຜາຖີ່, ຈຸດສຸມແຈຝ່າຍ ແລະ ຈຸດສຸມເມືອງເປີ້ ລວມມີ 20 ບ້ານ, 303 ຄອບຄົວ, ປ່ອຍເງິນໃຫ້ສະມາຊິກໄດ້ 1,4 ຕື້ກວ່າກີບ.
ຂ່າວ: ສີອໍາພອນ, ວສລ