ປກສ ແຂວງອັດຕະປື ລາຍງານວ່າ: ວັນທີ 1 ສິງຫາ 2024 ນີ້ ເຈົ້າໜ້າທີ່ຕຳຫຼວດ ສືບສວນ-ສອນສວນ ກອງບັນຊາການປ້ອງກັນຄວາມສະຫງົບແຂວງ ອັດຕະປື ໄດ້ນຳເອົາຜູ້ຕ້ອງຫາ 2 ຄົນທີ່ກໍ່ເຫດລັກສາຍໄຟແອ ຢູ່ຕາມພະແນກການຂອງແຂວງມາເຮັດແຜນປະກອບຮັບຄໍາສາລະພາບ.
ເຊິ່ງທັງສອງຖືກເຈົ້າໜ້າທີ່ຈັບຕົວໃນເດືອນກໍລະກົດຜ່ານມາ ຜູ້ກໍ່ເຫດ ຊື່ທ້າວ ຫັດທະສົງ ອາຍຸ 16 ປີ, ວ່າງງານ ແລະ ທ້າວ ສີນວນ ອາຍຸ 16 ປີ ວ່າງງານ, ທັງ 2 ຄົນ ແມ່ນຢູ່ບ້ານ ໄຊສະອາດ ເມືອງສາມັກຄີໄຊ ແຂວງອັດຕະປື, ໄດ້ພາກັນອອກຫາລັກຊັບປະ ເພດສາຍໄຟແອ ຢູ່ຕາມພະແນກການຕ່າງໆ ໃນເທສະບານແຂວງອັດຕະປື ລວມແອເຢັນທີ່ຖືກຕັດສາຍໄຟ 56 ໜ່ວຍ, ຄອມພີວເຕີໂນດບຸ໊ກ 3 ໜ່ວຍ ແລະ ໝໍ້ໄຟລົດໃຫຍ່ 4 ໜ່ວຍ ພາຍຫຼັງກໍ່ເຫດແລ້ວໄດ້ນຳໄປເຊື່ອງໄວ້ຢູ່ປ່າ ແລ້ວກໍປອກເອົາແຕ່ທອງໄປຂາຍໃຫ້ຮ້ານຮັບຊື້ຂາຍເຫຼັກເສດ.
ປັດຈຸບັນຄະດີດັ່ງກ່າວ ແມ່ນຢູ່ໃນຂັ້ນຕອນ ນຳເອົາສຳນວນຄະດີ ສົ່ງຟ້ອງໄອຍະການປະຊາຊົນແຂວງ ອັດຕະປື ເພື່ອດຳເນີນຄະດີຕາມຂັ້ນຕອນຂອງກົດໝາຍຕໍ່ໄປ.
ຂ່າວ: ປກສ ແຂວງອັດຕະປື, ວສລ