ຕາມຂ່າວຈາກ ປກສ ແຂວງຫົວພັນລາຍງານວ່າ: ວັນທີ 30 ກໍລະກົດ 2024, ເຈົ້າໜ້າທີ່ ປກສ ແຂວງຫົວພັນ ໄດ້ນຳຕົວຜູ້ກໍ່ເຫດພະຍາຍາມຄາຕະກຳຜູ້ອື່ນ ມາຈຳລອງເຫດການຄືນ ເພື່ອປະກອບຄຳຮັບສາລະພາບ ແລະ ປະກອບສຳນວນສົ່ງໄອຍະການຖະແຫລງສັ່ງຟ້ອງຕັດສິນຄະດີຕາມຂັ້ນຕອນກົດໝາຍ.
ເຈົ້າໜ້າທີ່ ປກສ ແຂວງຫົວພັນ ໃຫ້ຮູ້ວ່າ: ເຫດການດັ່ງກ່າວ ເກີດຂຶ້ນ ເມື່ອວັນທີ 12 ເມສາ 2024 ເມື່ອ ທ້າວ ສຸລິວັນ ຫລື ຜິວ (ຜູ້ກໍ່ເຫດ) ຢູ່ບ້ານປຶ່ງ ເມືອງສົບເບົາ ແຂວງຫົວພັນ, ໄດ້ອອກຈາກເຮືອນໄປຢາມພີ່ນ້ອງ ຢູ່ບ້ານລ້ອງຫຸ່ມ ເມືອງດຽວກັນ ແລະ ໄດ້ກິນເຂົ້າສາມັກຄີພົບປະສັງສັນນຳກັນຈົນເມົາ. ຮອດເວລາປະມານ 14:30 ໂມງ ຜູ້ກ່ຽວຈຶ່ງໄດ້ຄອບລາພີ່ນ້ອງແລ້ວກັບໄປເຮືອນ. ໃນຂະນະທີ່ຂັບຂີ່ລົດຈັກກັບເຮືອນນັ້ນ ໄດ້ໄປຕຳໃສ່ກອງຫີນຢູ່ກາງທາງແຕ່ບໍ່ບາດເຈັບ ແລະ ບ່ອນເກີດເຫດຢູ່ໃກ້ກັບເຮືອນດີແດ່, ຜູ້ກ່ຽວກໍລຸກຂຶ້ນແລ້ວຍ່າງໄປຫາໝູ່ຢູ່ເຮືອນດີເພື່ອຊວນເອົາໝູ່ໄປດື່ມເຫຼົ້ານຳກັນ ແຕ່ບໍ່ມີໃຜໄປນຳ, ຈຶ່ງໃຈຮ້າຍ ແລ້ວຍ່າງກັບໄປເອົາເງິນຢູ່ເຮືອນ 400,000 ກີບ ພ້ອມປືນແຕ່ງລູກແມັກ ແລະ ມີດແຫຼມ 1 ດວງ ແລ້ວຍ່າງກັບຄືນມາຊວນໝູ່ໄປດື່ມເຫຼົ້ານຳອີກ ແຕ່ບໍ່ມີໃຜໄປນຳ, ຜູ້ກ່ຽວຈຶ່ງເກີດຄວາມໂມໂຫ ຈັບປືນຍິງໃສ່ຫົວ ທ້າວ ອ້ອຍ 1 ບາດ ແຕ່ລູກປືນບໍ່ແຕກ ແລະ ພະຍາຍາມຈະຍິງໃສ່ອີກ ແຕ່ມີຄົນມາຊ່ວຍດຶງປືນໄວ້ ແລະ ຜູ້ກ່ຽວຈຶ່ງເອົາທ້າຍປຶນທຸບໃສ່ຫົວ ທ້າວ ອ້ອຍ ຈົນບາດເຈັບຫົວແຕກ ແລ້ວຫລົບໜີໄປ.
ຈາກນັ້ນ, ເຈົ້າໜ້າທີ່ ປກສ ເມືອງສົບເບົາໄດ້ພະຍາຍາມ ຕິດຕາມນຳຈັບຕົວຜູ້ກ່ຽວ ແລະ ໃນທີ່ສຸດກໍ່ສາມາດນຳຈັບຕົວຜູ້ກ່ຽວມາດຳເນີນຄະດີຕາມລະບຽບກົດໝາຍໄດ້.
ແຫຼ່ງຂ່າວ: ຄວາມສະຫງົບ