ແຈ້ງເຕືອນໄພນໍ້າຖ້ວມ ປະຈໍາເຊົ້າ ວັນທີ 1 ສິງຫາ 2024, ເຊິ່ງໃຫ້ປະຊາຊົນທີ່ອາໃສຢູ່ລຽບຕາມນໍ້າເຊບັ້ງໄຟ, ເມືອງເຊບັ້ງໄຟ, ແຂວງຄໍາມ່ວນ ຈົ່ງມີສະຕິລະມັດລະວັງ ແລະ ກຽມພ້ອມຮັບມືຕໍ່ສະພາບ ນໍ້າຖ້ວມ ທີ່ອາດຈະເກີດຂຶ້ນ ພ້ອມທັງກະກຽມຍົກຍ້າຍວັນຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ປອດໄພ.
ເນື່ອງຈາກຮ່ອງຄວາມດັນອາກາດຕໍ່າ ຫຼື ຮ່ອງຝົນ ໄດ້ພາດຜ່ານ ພາກເໜືອ ແລະ ພາກກາງຂອງປະເທດລາວ ສົມທົບກັບກະແສລົມ ມໍລະສຸມຕາເວັນຕົກສ່ຽງໃຕ້ ພັດປົກຄຸມດ້ວຍກໍາລັງປານກາງ, ເຊິ່ງໄດ້ເຮັດໃຫ້ມີຝົນຕົກເປັນບໍລິເວນກວ້າງຕິດຕໍ່ກັນ ໃນໄລຍະຫຼາຍວັນຜ່ານມາ ຢູ່ໃນເຂດພາກເໜືອ ແລະ ພາກກາງ ໄດ້ເຮັດໃຫ້ລະດັບນໍ້າຢູ່ຕາມແມ່ນໍ້າສາຂາ ຢູ່ເຂດພາກກາງເພີ່ມຂຶ້ນສູງຢ່າງຕໍ່ເນື່ອງ.
ໂດຍສະເພາະສະຖານີມະຫາໄຊ, ເມືອງມະຫາໄຊ ແລະ ສະຖານີເຊບັ້ງໄຟ, ເມືອງເຊບັ້ງໄຟ, ແຂວງຄໍາມ່ວນ ຄາດຄະເນວ່າ: ສະພາບຝົນຍັງຈະສືບຕໍ່ຕົກໃນລະດັບປານກາງ ຫາ ໜັກຕື່ມອີກ ອາດຈະເຮັດໃຫ້ລະດັບນໍ້າສາຂາຈະສືບຕໍ່ເພີ່ມສູງຂຶ້ນ ຮອດເຂດ ອັນຕະລາຍ ໃນໄລຍະ ວັນທີ 01 ສິງຫາ ຫາ 02 ສິງຫາ 2024 ນີ້, ຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນໍ້າ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.