ໃນວັນທີ 29 ກໍລະກົດ 2024, ທີ່ຫ້ອງວ່າການສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຈອນ ລີ ຫົວໜ້າຄະນະບໍລິຫານເຂດປົກຄອງພິເສດຮົງກົງ, ສປ ຈີນ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນວັນທີ 28-30 ກໍລະກົດ 2024.
ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຊົມເຊີຍຕໍ່ຜົນຂອງການພົບປະສອງຝ່າຍ ລະຫວ່າງ ທ່ານ ຈອນ ລີ ແລະ ທ່ານ ສະເຫລີມໄຊ ກົມມະສິດ ເຊິ່ງສອງຝ່າຍໄດ້ພ້ອມກັນແລກປ່ຽນຄໍາຄິດຄໍາເຫັນ ພ້ອມທັງໄດ້ລົງນາມເອກະສານຮ່ວມກັນ ຈໍານວນ 12 ສະບັບ, ເພື່ອເປັນບ່ອນອີງໃນການຈັດຕັ້ງປະຕິບັດກໍຄື: ການຊຸກຍູ້ການພົວພັນຮ່ວມມືໃນດ້ານການລົງທຶນ, ການຄ້າ, ການຊ່ວຍເຫຼືອເຊິ່ງກັນ ແລະ ກັນດ້ານພາສີ ແລະ ການຄັດເລືອກເອົານັກຮຽນມັດທະຍົມສົມບູນວຽງຈັນໄປສຶກສາຕໍ່ຂັ້ນປະລິນຍາຕີຢູ່ຮົງກົງ.
ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ເຊີນຊວນນັກທຸລະກິດຮົງກົງ ໃຫ້ມາລົງທຶນຢູ່ ສປປ ລາວ ຫຼາຍຂຶ້ນ ພ້ອມທັງເຊີນຊວນນັກທ່ອງທ່ຽວຈາກຮົງກົງ ເຂົ້າມາທ່ອງທ່ຽວຢູ່ ສປປ ລາວ, ໂດຍສະເພາະໃນປີທ່ອງທ່ຽວລາວ 2024 ນີ້ກໍຄື: ພາຍຫຼັງການເປີດຖ້ຽວບິນໂດຍກົງ ຮົງກົງ-ນະຄອນຫລວງວຽງຈັນ 1 ຖ້ຽວຕໍ່ອາທິດ, ນັບແຕ່ວັນທີ 7 ພຶດສະພາ 2024 ເປັນຕົ້ນມາ.
ໃນຂະນະດຽວກັນ, ທ່ານ ຈອນ ລີ ຫົວໜ້າຄະນະບໍລິຫານເຂດປົກຄອງພິເສດຮົງກົງ, ສປ ຈີນ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ແຈ້ງຈຸດປະສົງຂອງການເດີນທາງມາຢ້ຽມຢາມ ສປປ ລາວ ຄັ້ງນີ້, ພ້ອມທັງໄດ້ລາຍງານຜົນການພົບປະສອງຝ່າຍກັບ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ.
ຂ່າວ: ກົມການຂ່າວ, ກະຊວງການຕ່າງປະເທດ
ພາບ: ເກດສະໜາ