ເມື່ອບໍ່ດົນມານີ້, ເຈົ້າໜ້າທີ່ພະແນກຕຳຫຼວດຈະລາຈອນ ປກສ ແຂວງຈຳປາສັກ ໄດ້ກັກຕົວກຸ່ມໄວລຸ້ນຈຳນວນ 5 ຄົນ ທີ່ຂີ່ລົດໄວ-ໃຊ້ສຽງດັງ
ພ້ອມດັດແປງສະພາບເຕັກນິກລົດ ມາສຶກສາອົບຮົມ.
ທ່ານພັນຕີ ບຸນທັນ ວົງຜາສຸກ ຫົວໜ້າກອງໂຄສະນາ ພະແນກຕຳຫຼວດຈະລາຈອນ ປກສ ແຂວງຈຳປາສັກໄດ້ສຶກສາອົບອົບຕໍ່ກຸ່ມດັ່ງກ່າວ ເພື່ອໃຫ້ຮັບຮູ້ແລະເຂົ້າໃຈເຖິງຜົນຮ້າຍ ແລະ ໄພອັນຕະລາຍຂອງການຂັບຂີ່ລົດໄວ, ໃຊ້ສຽງດັງ ລົບກວນສັງຄົມ, ຂັບຂີ່ເປັນພຶງເປັນແພ, ຍົກລໍ້, ດັດແປງສະພາບເຕັກນິກລົດ ແລະ ບັນຫາອື່ນໆທີ່ພາໃຫ້ເກີດອຸບັດຕິເຫດ, ເຊິ່ງສົ່ງຜົນເສຍຕໍ່ກັບຕົນເອງ, ຄອບຄົວ ແລະ ສັງຄົມ.
ພ້ອມນີ້ຍັງຮຽກຮ້ອງໃຫ້ພວກກ່ຽວປັບປຸງຕົນເອງໃຫ້ເປັນຄົນດີຂອງສັງຄົມ, ຈາກນັ້ນໄດ້ເຮັດບົດບັນທຶກກ່າວເຕືອນ ເພື່ອບໍ່ໃຫ້ກັບມາກະທຳຜິດອີກ, ຖ້າກະທຳຜິດອີກຈະຖືກດຳເນິນຄະດີຕາມລະບຽບກົດໝາຍ ແລະ ມອບຄືນລົດໃຫ້ໄປສ້ອມແປງສະພາບເຕັກນິກຄືນສູ່ປົກກະຕິ.