ທ່ານ ບຸນຊົມ ຊົງວິໄລ ຫົວໜ້າພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ (ນວ) ໄດ້ລາຍງານໃນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນ ນວ ຊຸດທີ II ຜ່ານມາວ່າ: ໃນຂອບເຂດທີ1 ເນື້ອທີ່ 51,1 ເຮັກຕາ, ມີຕອນດິນທີ່ຖືກຜົນກະທົບທັງໝົດ 90 ຕອນ, ມູນຄ່າທົດແທນທັງໝົດ 84 ກວ່າຕື້ກີບ, ເປັນເຂດພື້ນທີ່ໂຄງການທ່າບົກທ່ານາແລ້ງເຂດໂລຊິດສຕິກ ນະຄອນຫຼວງວຽງຈັນ ຈະເຮັດການທົດແທນໃນນາມລັດຖະບານລາວ ເພື່ອສົ່ງມອບພື້ນທີ່ໃຫ້ໂຄງການລົດໄຟລາວ-ຈີນ ກໍ່ສ້າງເປັນສະຖານີ້ຄວບຄຸມລົດໄຟ, ພື້ນທີ່ເຂດໂຄງການສ່ວນຫຼາຍເປັນດິນທີ່ມີສິດນໍາໃຊ້ທີ່ດິນບຸກຄົນ ແລະ ນິຕິບຸກຄົນເຊິ່ງສ່ວນຫຼາຍແມ່ນມີໃບຕາດີນຖືກຕ້ອງຕາມກົດໝາຍແລ້ວ ແລະ ໄດ້ຈ່າຍຄ່າທົດແທນແລ້ວຈຳນວນ 35 ຕອນ, ມູນຄ່າ 7,4 ກວ່າຕື້ກີບ, ຍັງຄ້າງ 55 ຕອນ, ມູນຄ່າ 77 ກວ່າຕື້ກີບທີ່ບໍ່ທັນຈ່າຍຄ່າທົດແທນ.
ສາເຫດທີ່ຍັງຄ້າງ ແລະ ເຈົ້າຂອງສິດນຳໃຊ້ທີ່ດິນບໍ່ຍອມຮັບຄ່າທົດແທນຄ່າເສຍຫາຍຍ້ອນ ຂອບເຂດດັ່ງກ່າວແມ່ນມີສອງໂຄງການທີ່ມີຫົວໜ່ວຍທົດແທນຕ່າງກັນມາປະຕິບັດໃນພື້ນທີ່ດຽວກັນ, ໂດຍສະເພາະແມ່ນໂຄງການທາງລົດໄຟລາວ-ຈີນ, ເຈົ້າຂອງສິດນໍາໃຊ້ທີ່ດິນຍັງລໍຖ້າເບິ່ງການທົດແທນຄ່າເສຍຫາຍໂຄງການກໍ່ສ້າງທາງລົດໄຟລາວ-ຈີນ, ຍ້ອນວ່າຫົວໜ່ວຍການທົດແທນສູງກວ່າ.
ຜ່ານມາໄດ້ຮັບທິດຊີ້ນໍາຈາກທ່ານເຈົ້າຄອງ ນະຄອນຫຼວງວຽງຈັນ ເຫັນດີໃຫ້ປະຕິບັດໃນລາຄາທົດແທນຂອງໂຄງການກໍ່ສ້າງທາງລົດໄຟລາວ-ຈີນລາຄາ 210.000ກີບ/ຕາແມັດ, ແຕ່ສະເໜີໃຫ້ເຈົ້າຂອງສິດນໍາໃຊ້ທີ່ດິນຮັບ ເອົາຄ່າທົດແທນຕາມຫົວໜ່ວຍລາຄາຂອງໂຄງການທ່າບົກທ່ານາແລ້ງ ເຂດໂລຊິດສຕິກ ນະຄອນຫຼວງວຽງຈັນໃນລາຄາ 150.000 ກີບ/ຕາແມັດກ່ອນຍ້ອນວ່າໂຄງການດັ່ງກ່າວມີຫົວໜ່ວຍການທົດແທນກ່ອນໂຄງການກໍ່ສ້າງທາງລົດໄຟລາວ-ຈີນ.
ສ່ວນມູນຄ່າຜິດດ່ຽງ 60.000 ກີບ/ຕາແມັດ ແມ່ນໃຫ້ບໍລິສັດຜູ້ພັດທະນາທັງສອງໂຄງການຕອບສະໜອງການທົດແທນ, ປະຈຸບັນທາງໂຄງການທັງສອງໂຄງການຍັງບໍ່ທັນໄດ້ປະຕິບັດການທົດແທນໃນມູນຄ່າຜິດດ່ຽງ 60.000 ກີບ/ຕາແມັດ ແລະ ປະຊາຊົນກໍ່ບໍ່ຍອມຮັບເອົາໃນລາຄາ 150,000ກີບ/ຕາແມັດຂອງໂຄງການທ່າບົກທ່ານາແລ້ງເຂດໂລຊິດສຕິກ ນະຄອນຫຼວງວຽງຈັນ, ສະເໜີໃຫ້ທົດແທນໃນລາຄາ 210,000 ກີບ/ຕາແມັດພ້ອມກັນຈຶ່ງຈະຮັບເອົາຄ່າທົດແທນ.
ຂ່າວ: ເສດຖະກິດ-ການຄ້າ