ທະນາຄານ ແຫ່ງ ສປປ ລາວ ໄດ້ຈັດພິທີເປີດຂະບວນການລົງຕິດຕາມການຕິດລາຄາສິນຄ້າ ແລະ ການແລກປ່ຽນເງິນຕາ ຂຶ້ນໃນວັນທີ 18 ກໍລະກົດ ນີ້ ທີ່ສຳນັກງານ ຄະນະກຳມະການຄຸ້ມຄອງຫຼັກຊັບ (ສຄຄຊ) ພາຍໃຕ້ການເປັນປະທານກ່າວເປີດຂະບວນການດັ່ງກ່າວ ໂດຍທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທະນາຄານ ແຫ່ງ ສປປ ລາວ ເຊິ່ງມີພະນັກງານຈາກກະຊວງປ້ອງກັນຄວາມສະຫງົບ, ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງອຸດສາຫະກຳ ແລະ ການຄ້າ ເຂົ້າຮ່ວມ.
ທະນາຄານແຫ່ງ ສປປ ລາວ ຕາງໜ້າໂດຍກົມຄຸ້ມຄອງເງິນຕາຕ່າງປະເທດ ຈຶ່ງໄດ້ເປີດຂະບວນການລົງຕິດຕາມການຕິດລາຄາສິນຄ້າ ແລະ ການແລກປ່ຽນເງິນຕາຂຶ້ນ ເພື່ອໃຫ້ເປັນການລົງຕິດຕາມ, ເຜີຍແຜ່ ແລະ ໃຫ້ທຸກຄົນມີສະຕິ ໃນການຈັດຕັ້ງປະຕິບັດນິຕິກໍາຕ່າງໆກ່ຽວກັບການຄຸ້ມຄອງເງິນຕາຕ່າງປະເທດ ແລະ ສົ່ງເສີມການນໍາໃຊ້ເງິນກີບຢ່າງກວ້າງຂວາງ ໃຫ້ເຫັນໄດ້ຄຸນຄ່າຂອງເງິນກີບ ຫັນມາຖືຄອງ ແລະ ນໍາໃຊ້ເງິນກີບໃນການຊໍາລະຄ່າສິນຄ້າ ແລະ ບໍລິການຕ່າງໆຢູ່ພາຍໃນປະເທດໃຫ້ຫຼາຍຂຶ້ນ.
ຫຼຸດຜ່ອນການນໍາໃຊ້ເງິນຕາຕ່າງປະເທດໃຫ້ໜ້ອຍລົງ.ເພື່ອເຮັດໃຫ້ຂະບວນການຄັ້ງນີ້ ໄດ້ຮັບຜົນຕາມລະດັບຄາດໝາຍ, ຈຶ່ງຮຽກຮ້ອງມາຍັງບັນດາທ່ານຈົ່ງໄດ້ເອົາໃຈໃສ່ຈັດຕັ້ງປະຕິບັດໃຫ້ປະກົດຜົນເປັນຈິງ.
ຂ່າວ-ພາບ: ທຫລ, ວສລ