ໃນວັນທີ 17 ກໍລະກົດທີຜ່ານມາ ເຈົ້າໜ້າທີ່ ປກສ ແຂວງຫົວພັນ ໄດ້ສຶກສາອົບຮົມ ກຸ່ມແກ້ງໄວລຸ້ນ ອາລະວາດຕີກັນ ຢູ່ເດີ່ນໜ້າປ່າຊ້າຈີນ, ບ້ານໂພໄຊ, ເມືອງຊໍາເໜືອ ແຂວງຫົວພັນ, ເມື່ອວັນທີ 25 ເມສາທີ່ຜ່ານມາ.
ເຊິ່ງເຈົ້າໜ້າທີ່ໄດ້ເຫັນວິດີໂອເຫດການດັ່ງກ່າວໃນສື່ສັງຄົມອອນລາຍ,ພາຍຫຼັງທີ່ໄດ້ເຫັນວີດີໂອດັ່ງກ່າວ ເຈົ້າໜ້າທີ່ໄດ້ປະສານສົມທົບພາກສ່ວນກ່ຽວຂ້ອງລົງເກັບກຳຂໍ້ມູນ ເຫັນວ່າມີຄວາມຈິງແທ້, ຈຶ່ງໄດ້ນຳຕົວພວກດັ່ງກ່າວ ມາດຳເນີນການສືບສວນສອບສວນຕາມຂັ້ນຕອນກົດໝາຍ.
ຈາກການສືບສວນໃຫ້ຮູ້ວ່າ: ກຸ່ມດັ່ງກ່າວມີອາຍຸ 17 ປີ ຈຳນວນ 3 ຄົນ ແລະ 18 ປີ ຈຳນວນ 1 ຄົນ, ເຊິ່ງເຈົ້າໜ້າທີ່ໄດ້ສຶກສາອົບຮົມ , ເຮັດບົດບັນທຶກ ແລະ ສົ່ງຄືນໃຫ້ຜູ້ປົກຄອງ, ແຕ່ວ່າຫາກມີການກະທຳຜິດອີກຈະໄດ້ທຳການປະຕິບັດຕາມກົດໝາຍຢ່າງເຂັ້ມຫງວດ. ຕໍ່ກັບເຫດການທີ່ເກີດຂຶ້ນ ພວກກ່ຽວໄດ້ປະຕິຍານຕົນວ່າ: ຈະບໍ່ເຂົ້າຮ່ວມກຸ່ມແກ້ງຕີກັນອີກ, ຖ້າຫາກມີການກະທຳຜິດອີກ ແມ່ນຈະທຳການດຳເນີນຄະດີຕາມລະບຽບກົດໝາຍ.
ຂ່າວ: ປກສ ຫົວພັນ