ໃນວັນທີ 12 ກໍລະກົດ ທີ່ຜ່ານມາ, ເວລາປະມານ 18:30 ນາທີ ເຈົ້າໜ້າທີ່ຈຸດກວດການໍ້າທຸ່ງ, ແຂວງບໍ່ແກ້ວ ໄດ້ກວດກາລົດບັນທຸກ 22 ລໍ້, ແລ່ນມາແຕ່ທາງເມືອງຫ້ວຍຊາຍ ແຂວງບໍ່ແກ້ວ ມຸ່ງໜ້າໄປຍັງ ແຂວງຫຼວງນໍ້າທາ, ເຈົ້າໜ້າທີ່ໄດ້ກວດກາລົດຄັນດັ່ງກ່າວພົບເຫັນເປົາປຸ໋ຍພາຍໃນລົດ 300 ເປົາ, ເມື່ອສອບຖາມກ່ຽວກັບເອກະສານຕິດຂັດຂອງສິນຄ້າ ພ້ອມສອບຖາມຜູ້ຂັບລົດກໍເຫັນວ່າບໍ່ກົງກັນ, ຜູ້ຂັບມີທ່າທາງພິລຸດ ຍ່າງຈັບໂທລະສັບໄປ-ມາ, ເຈົ້າໜ້າທີ່ຈຶ່ງໄດ້ກັກຕົວໄວ້, ສ່ວນຜູ້ມານຳອີກໜຶ່ງຄົນໄດ້ເອົາຕົວຫຼົບໜີເຂົ້າປ່າໄປ.
ມາໃນວັນທີ 14 ກໍລະກົດທີ່ຜ່ານມາ, ເຈົ້າໜ້າທີ່ໄດ້ກວດຄົ້ນສິນຄ້າໃນລົດດັ່ງກ່າວ ພົບຢາເສບຕິດປະເພດຢາບ້າ 1,021 ມັດເທົ່າກັບ 2,042,000 ເມັດ ແລະ ຢາໄອສ໌ 960 ກິໂລກຣາມ. ປັດຈຸບັນນີ້, ເຈົ້າໜ້າທີ່ ກຳລັງທຳການສືບສວນສອບສວນຜູ້ຂັບລົດຄັນດັ່ງກ່າວ ພ້ອມຕິດຕາມຕົວຜູ້ຫຼົບໜີໄປ ມາລົງໂທດຕາມລະບຽບກົດໝາຍ.
ຂ່າວ: ປກສ ບໍ່ແກ້ວ