ເຈົ້າໜ້າທີ່ວິຊາສະເພາະ ກອງບັນຊາການ ປກສ ແຂວງ ສະຫວັນນະເຂດ ກັກຕົວເປົ້າໝາຍທີ່ກໍ່ເຫດປຸ້ນຮ້ານຄຳ ຢູ່ ແຂວງຄຳມ່ວນ ຈຳນວນ 1 ຄົນ, ຊື່ທ້າວ ນັນທະພອນ ພຽງຄຳດີ ຫຼື ບອນ, ອາຍຸ 36 ປີ, ອາຊີບ ວ່າງງານ, ເຊື່ອຊາດ ແລະ ສັນຊາດໄທ, ຢູ່ບ້ານທຸ້ງທອງ, ເມືອງ ໜອງບົວ, ຈັງຫວັດນະຄອນສະຫວັນ ປະເທດໄທ , ມີອາວຸດປືນສັ້ນ 1 ກະບອກ, ພ້ອມດ້ວຍລູກປືນຈໍານວນ 28 ລູກ.
ພັອ ວົງຄໍາ ອິນທະບານ ຮອງຫົວໜ້າກອງບັນຊາການ ປກສ ແຂວງ ສະຫວັນນະເຂດ ຜູ້ຊີ້ນໍາວຽກງານຫ້ອງຕໍາຫຼວດໄດ້ໃຫ້ຮູ້ວ່າ: ໃນວັນທີ 1 ກໍລະກົດ 2024 ເວລາປະມານ 16 ໂມງ, ໄດ້ຮັບການປະສານລາຍງານຈາກເຈົ້າໜ້າທີ່ກອງບັນຊາການ ປກສ ແຂວງ ຄໍາມ່ວນ ວ່າ: ໄດ້ມີເຫດການຄົນຮ້າຍປຸ້ນຮ້ານຄໍາ, ຢູ່ບ້ານປາກດົງ, ເມືອງ ທ່າແຂກ, ແຂວງ ຄໍາມ່ວນ, ຜົນເສຍຫາຍມີ ສາຍຄໍຄໍາ ຈໍານວນ 4 ເສັ້ນ, ເສັ້ນລະ 2 ສະຫຼຶງ, ລວມນໍ້າໜັກ 2 ບາດ, ຄົນຮ້າຍທີ່ເຂົ້າມາກໍ່ເຫດປຸ້ນຊັບໃນຄັ້ງນີ້ມີຈໍານວນ 1 ຄົນ, ນຸ່ງໂສ້ງຢີນສີຟ້າແກ່, ນຸ່ງເສື້ອກັນລົມສີດໍາ, ໃສ່ແພຄ້ອງຄໍສີບົວ ນໍາໃຊ້ອາວຸດປືນສັ້ນໃນການກໍ່ເຫດ, ພາຍຫຼັງກໍ່ເຫດແລ້ວ ແມ່ນນໍາໃຊ້ລົດຈັກ ຮອນດ້າ ເປັນພາຫະນະໃນການຂັບຂີ່ຫຼົບໜີ ແລະ ຄາດວ່າຄົນຮ້າຍຈະເອົາຕົວຫຼົບໜີມາລີ້ຊ້ອນຢູ່ ແຂວງ ສະຫວັນນະເຂດ, ເມື່ອໄດ້ຮັບແຈ້ງຄືແນວນັ້ນ ທາງເຈົ້າກອງບັນຊາການປກສ ແຂວງສະຫວັນນະເຂດ, ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະ ລົງຕິດຕາມກວດກາຊອກຫາຜູ່ກໍ່ເຫດ.
ຕົກມາຮອດເວລາປະມານ 19 ໂມງຂອງວັນທີ 4 ກໍລະກົດ 2024 ເຈົ້າໜ້າທີ່ວິຊາສະເພາະກອງພັນເຄື່ອນທີ່ ກອງບັນຊາການ ປກສ ແຂວງ ສະຫວັນນະເຂດ, ຈຶ່ງໄດ້ພົບເຫັນລົດຈັກທີ່ສົງໃສ, ຍີ່ຫໍ້ຮອນດ້າ ພໍຊ້າ ສີປອນແດງ, ບໍ່ຕິດແຜ່ນປ້າຍທະບຽນ ຈອດຢູ່ໜ້າຮ້ານມິນີມາກ, ເຂດບ້ານອຸດົມວິໄລ, ນະຄອນໄກສອນພົມວິຫານ, ພ້ອມກັບຜູ້ຂັບຂີ່ ເປັນເພດຊາຍ 1 ຄົນ ແລະ ເພດຍິງ 1 ຄົນ, ເບິ່ງລັກສະນະມີພິລຸດ, ຈາກນັ້ນທາງເຈົ້າໜ້າວິຊາສະເພາະຈຶ່ງໄດ້ສະແດງຕົວເຂົ້າ ໄປສອບຖາມ ແລະ ກວດກາເອກະສານລົດ, ໃນເວລາເຈົ້າໜ້າທີ່ ວິຊາສະເພາະ ຈະໄດ້ທໍາການກວດກາ ຜູ້ກ່ຽວແມ່ນຈະມີການຂັດຂືນພ້ອມຈະເອົາຕົວຫຼົບໜີ, ສະນັ້ນເຈົ້າໜ້າທີ່ ຈຶ່ງໄດ້ເຂົ້າໄປກຸມທັນທີ.
ພ້ອມທັງກວດຕົນຕົວແລ້ວພົບເຫັນສິ່ງທີ່ຜິດກົດໝາຍຄື: ອາວຸດປືນສັ້ນ 1 ກະບອກ, ພ້ອມດ້ວຍລູກປືນຈໍານວນ 28 ລູກ, ທີ່ຜູ້ກ່ຽວຊຸກເຊື່ອງໄວ້ ຢູ່ໃນແອວທາງດ້ານຫນ້າ, ແລະ ກັກຕົວຜູ້ກ່ຽວ ໃຫ້ເຈົ້າໜ້າທີ່ວິຊາສະເພາະ ໄປສືບສວນ-ສອບສວນຂະຫຍາຍຜົນ, ພ້ອມກັບລົດຈັກ 1 ຄັນ ແລະ ຜູ້ຍິງທີ່ໄປກັບຜູ້ກ່ຽວ 1 ຄົນ, ຜ່ານການສອບສວນຈຶ່ງຮູ້ໄດ້ວ່າ: ຜູ່ກ່ຽວເປັນຄົນໄທ, ຜ່ານການກວດກາປະຫວັດ ແມ່ນເຫັນວ່າ: ຜູ້ກ່ຽວເຄີຍມີປະຫວັດກໍ່ເຫດມາກ່ອນແລ້ວ ແລະ ຍັງໃຫ້ການຮັບສາລະພາບວ່າ: ໃນຄັ້ງວັນທີ 1 ກໍລະກົດ 2024 ແມ່ນໄດ້ກໍ່ເຫດປຸ້ນຄໍາຢູ່ເມືອງ ທ່າແຂກ, ແຂວງ ຄໍາມ່ວນ, ປະຈຸບັນ ທາງເຈົ້າໜ້າທີ່ ປກສ ແຂວງ ສະຫວັນນະເຂດ ແມ່ນໄດ້ມອບຕົວຜູ້ກ່ຽວໃຫ້ທາງເຈົ້າໜ້າທີ່ ກອງບັນຊາການ ປກສ ແຂວງ ຄໍາມ່ວນ ເພື່ອດໍາເນີນຄະດີຕາມຂັ້ນຕອນຂອງກົດໝາຍ ສປປ ລາວ.