ສົກ 2024-2025 ມະຫາວິທະຍາໄລແຫ່ງຊາດ ມີແຜນຮັບເອົານັກສຶກສາ ຈຳນວນ 5,920 ຄົນ, ຖ້າທຽບໃສ່ສົກຜ່ານມາແມ່ນຫຼຸດລົງ, ປະຈຸບັນພວມກະກຽມຈັດການສອບເສັງ, ເຊິ່ງຈະຈັດຂຶ້ນຢ່າງເປັນທາງການໃນວັນທີ 10 ສິງຫາ 2024 ນີ້.
ຮສ ປອ ເດຊານຸລາດ ແສນດວງເດດ ວ່າການອະທິການບໍດີມະຫາວິທະຍາໄລແຫ່ງຊາດໃຫ້ສຳພາດວ່າ: ໄດ້ກະກຽມຄວາມພ້ອມການສອບເສັງດ້ານຕ່າງໆເປັນຕົ້ນ ໄດ້ຂໍອະນຸມັດຕົວເລກໂກຕາຮັບນັກສຶກສາໃຫມ່, ກຳນົດວັນສອບເສັງ, ສະຖານທີ່ສອບເສັງ,ແຕ່ງຕັ້ງຄະນະກຳມະການ, ພັດທະນາລະບົບສອບເສັງເພື່ອລົງທະບຽນແບບອອນລາຍ ແລະ ອື່ນໆ, ໂດຍເລີ່ມໃຫ້ນັກສອບເສັງສະໝັກລົງທະບຽນແບບເຊິ່ງໜ້າ, ເພື່ອອອກບັດເຂົ້າຫ້ອງສອບເສັງ, ເຊິ່ງເລີ່ມແຕ່ວັນທີ 15 ກໍລະກົດເປັນຕົ້ນໄປມາ, ຮອດປະຈຸບັນມີນັກສຶກສາສະແດງເຈດຈຳນົງເຂົ້າສອບເສັງຫຼາຍກວ່າ 500 ຄົນແລ້ວ.
ທ່ານໃຫ້ຮູ້ຕື່ມວ່າ: ສຳລັບການສອບເສັງປີນີ້ ຈະຈັດຮູບແບບເຊິ່ງໜ້າຄືປີຜ່ານມາ, ໂດຍການສອບເສັງຈະແບ່ງອອກເປັນ 2 ກຸ່ມຄື: ກຸ່ມ A ແມ່ນສາຍວິທະຍາສາດທຳມະຊາດ ມີ 8 ຄະນະວິຊາ ແລະ ກຸ່ມ B ສາຍວິທະຍາສາດສັງຄົມ ມີ 6 ຄະນະວິຊາ, ສ່ວນຕາຕະລາງສອບເສັງ ກຸ່ມ A ພາກເຊົ້າ ເລີ່ມແຕ່ເວລາ 9:00-11:00 ໃຊ້ເວລາ 120 ນາທີ ມີວິຊາ ຄະນິດ ສາດ A ແລະ ຟີຊິກສາດ, ພາກບ່າຍ ເວລາ 14:00-15:30 ໃຊ້ເວລາ 90 ນາທີ ມີວິຊາພາສາລາວ, ວັນນະຄະດີ ແລະເຄມີສາດ, ຊີວະສາດ ແລະພາສາອັງກິດ. ສ່ວນກຸ່ມ B ພາກເຊົ້າ 9:00-11:00 ໃຊ້ເວລາ 120 ນາທີ ມີວິຊາ ຄະນິດສາດ B, ພາສາລາວ, ວັນນະຄະດີ ແລະ ພາກບ່າຍ ເວລາ 14:00-15:30 ໃຊ້ເວລາ 90 ນາທີ ມີວິຊາ ພູມສາດ, ປະຫວັດສາດແລະ ພາສາອັງກິດ.
ພາບ: ກະຕ່າຍ ມາກໂນຊາ
ຂ່າວ: ອໍາໄພວັນ ວົງອໍາທອນ, ວສລ