ໃນທ້າຍອາທິດຜ່ານມາ, ກອງບັນຊາການ ປກສ ເມືອງຊໍາໃຕ້, ແຂວງຫົວພັນ ໄດ້ຈັດພີທີທຳລາຍອາວຸດລ່າເນື້ອ, ຈັກສະຕີນ, ທາດລະເບີດ, ປ້າຍລົດທີ່ບໍ່ຖືກຕ້ອງ ແລະ ປະເພດເຄື່ອງຕ້ອງຫ້າມຕ່າງໆ, ເຂົ້າຮ່ວມມີ ທ່ານ ຄຽນທອງ ທຳບຸນໄຊ ເຈົ້າເມືອງຊໍາໃຕ້, ພັທ ບຸນທັນ ສຸວັນໄຕ ຫົວໜ້າກອງບັນຊາການ ປກສ ເມືອງຊຳໃຕ້, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ພັທ ເສີມ ຈັນທາລາ ຮອງຫົວໜ້າກອງບັນຊາການ ປກສ ເມືອງຊໍາໃຕ້ ໃຫ້ຮູ້ວ່າເຄື່ອງທີ່ນໍາມາທຳລາຍໃນຄັ້ງນີ້ປະກອບມີ: ອາວຸດທັງໝົດ 156 ກະບອກ (ປືນແກັບ 102 ກະບອກ, ປືນອັງໂກນ 4 ກະບອກ, ປືນແວງ 3 ກະບອກ, ປືນຍີງລູກແມັກ 36 ກະບອກ, ປືນລົມ 7 ກະບອກ, ປືນສັບປະເຫຼັກ 3 ກະບອກ), ລູກປືນແມັກ 9 ແກັດ, ລູກຫວ່ານ 3 ເປົານ້ອຍ, ຂີ້ເກ່ຍ 12 ແກັດ, ລູກບີ 5,5 ກິໂລກຼາມ, ໝື້ 1 ແກັດ, ເຄື່ອງຊ໋ອດປາ 38 ເຄື່ອງ, ເລົາປືນ 18 ເລົາ, ຈັກສະຕີນ 12 ເຄື່ອງ, ດາບຈັກສະຕີນ 30 ອັນ, ຫົວຍິງລູກຕະປູ 34 ຫົວ, ທໍ່ອຸປະກອນດັດແປງປືນອັງໂກນ 144 ອັນ, ມອງນົກ 4 ອັນ ແລະ ປ້າຍລົດຈັກບໍ່ຖືກຕ້ອງ 81 ປ້າຍ (ປ້າຍລົດລາວ 60 ປ້າຍ ແລະ ປ້າຍລົດຫວຽດ 21 ປ້າຍ) ມາທໍາລາຍຖິ້ມ ດ້ວຍການນໍາໃຊ້ລົດຈົກຂຸດຂຸມ ແລ້ວນໍາເອົາເຄື່ອງດັ່ງກ່າວຖີ້ມລົງໃນຂຸມຖົມຢ່າງລະອຽດ ເພື່ອບໍ່ໃຫ້ສາມາດຂຸດຄົ້ນມານໍາໃຊ້ໄດ້ອີກ.
ຂ່າວ: ປກສ ແຂວງຫົວພັນ