ຈາກການໃຫ້ສຳພາດຂອງທ່ານ ຄຳພັນ ວັດທະນາ ຫົວໜ້າໂຄງການຂົນສົ່ງແບບຍືນຍົງໃນຕົວເມືອງ ນະຄອນຫຼວງວຽງຈັນ ລາຍງານສະພາບການກໍ່ສ້າງເສັ້ນທາງລົດເມດ່ວນ BRT ຜ່ານລາຍການວິທະຍຸ ຂັບຂີ່ປອດໄພ ວັນທີ 12 ກໍລະກົດ 2024 ວ່າ: ປັດຈຸບັນນີ້, ອີງໃສ່ການຈັດຕັ້ງປະຕິບັດໂຄງການທາງ, ພວກເຮົາໄດ້ລົງມືເຮັດມາໄດ້ໄລຍະໜຶ່ງແລ້ວ, ຈຸດກໍ່ສ້າງມີໄລຍະທາງ 13 ກິໂລ.
ນັບແຕ່ສວນເຈົ້າຟ້າງຸ່ມ ຫາ ມະຫາວິທະຍາໄລແຫ່ງຊາດ, ໃນການກໍ່ສ້າງແບ່ງເປັນ 2 ຊ່ວງຄື: ຊ່ວງ 1 ນັບແຕ່ສວນເຈົ້າຟ້າງຸ່ມ(ບໍລິເວນຂ້າງ ໂຮງແຮມ Somerset) ຫາ ປະຕູໄຊ, ຊ່ວງທີ 2 ປະຕູໄຊ(ໜ້າໂຮງຮຽນສິນໄຊ) ຫາ ມຊ. ເຊິ່ງການກໍ່ສ້າງຊ່ວງທີ 1 ເລີ່ມຕັ້ງແຕ່ເດືອນມິຖຸນາເປັນຕົ້ນມາ.
ສຳລັບ, ການກໍ່ສ້າງໂຄງການດັ່ງກ່າວມີສະຖານີຂຶ້ນ-ລົງທັງໝົດ 27 ຈຸດ, ນອກນີ້ຈະມີການຕິດຕັ້ງໄຟຈະລາຈອນ 41 ຈຸດໃນຂອບເຂດໂຄງການທີ່ລົດເມແລ່ນຜ່ານ ບໍລິເວນທາງຂົບ, ທາງແຍກ, ເພື່ອອຳນວຍຄວາມສະດວກໃຫ້ລົດເມ ໄດ້ເດີນທາງສະດວກ, ວ່ອງໄວ, ໂດຍບໍ່ຕ້ອງໃຊ້ເວລາລໍຖ້າດົນ.
ການນຳໃຊ້ເສັ້ນທາງລົດເມນີ້, ບໍ່ໄດ້ເປີດນຳໃຊ້ສະເພາະລົດເມຢ່າງດຽວເທົ່ານັ້ນ, ແຕ່ລົດສຸກເສີນ, ລົດການນຳຕ່າງໆ ກໍສາມາດນຳໃຊ້ເສັ້ນທາງນີ້ໄດ້. ສ່ວນລົດທົ່ວໄປກໍສາມາດນຳໃຊ້ໄດ້ ແຕ່ຈະໃຊ້ໄດ້ໃນບາງເວລາທີ່ກຳນົດໃຫ້ເທົ່ານັ້ນ.
ນອກນີ້, ທ່ານຍັງໄດ້ຝາກເຖິງຜູ້ນຳໃຊ້ລົດ-ໃຊ້ຖະໜົນທຸກທ່ານ ໃຫ້ລະມັດລະວັງ ແລະ ສັງເກດສັນຍານດ ປ້າຍເຕືອນ ບໍລິເວນໃກ້ເຂດກໍ່ສ້າງໂຄງການດັ່ງກ່າວ, ເພື່ອປ້ອງກັນການເກີດອຸບັດຕິເຫດ.
ຂໍ້ມູນ: ລາຍການວິທະຍຸ ຂັບຂີ່ປອດໄພ