ໃນວັນທີ 22 ພຶດສະພາ ທີ່ຜ່ານມາ, ເຈົ້າໜ້າທີ່ຕຳຫຼວດວິຊາສະເພາະ ປກສ ເມືອງທ່າແຂກ ແຂວງຄຳມ່ວນ ໄດ້ຮັບລາຍງານຈາກພົນລະເມືອງດີວ່າ: ຈະມີການຊື້-ຂາຍຢາເສບຕິດຢູ່ເຂດບ້ານຕານ, ເມືອງທ່າແຂກ, ແຂວງຄຳມ່ວນ, ພາຍຫຼັງໄດ້ຮັບການລາຍງານ ທາງເຈົ້າໜ້າທີ່ຕຳຫຼວດ ຈຶ່ງໄດ້ນຳກຳລັງລົງກວດກາຕິດຕາມສະຖານທີ່ດັ່ງກ່າວ.
ຕໍ່ມາຮອດເວລາ 15 ໂມງ ຂອງວັນດຽວກັນ ທາງເຈົ້າໜ້າທີ່ຕຳຫຼວດ ຈຶ່ງໄດ້ພົບເຫັນເປົ້າໝາຍ ຈຳນວນ 2 ຄົນເຂົ້າມາຊື້-ຂາຍຢາເສບຕິດ ຢູ່ເຮືອນແຫ່ງໜຶ່ງ ພາຍໃນບ້ານ ດັ່ງກ່າວ, ດັ່ງນັ້ນທາງເຈົ້າໜ້າທີ່ ຈຶ່ງໄດ້ເຂົ້າກັກຕົວເປົ້າໝາຍໄດ້ 3 ຄົນ ພ້ອມຢືດຂອງກາງປະເພດຢາບ້າໄດ້ທັງໝົດຈຳນວນ 8 ມັດ ແລະ 3.306 ເມັດ ລວມເປັນ 19.306 ເມັດ ທີ່ຊຸກເຊື່ອງໄວ້ໃນເຮືອນຫຼັງດັ່ງກ່າວ.
ຜ່ານການສືບສວນ-ສອບສວນຂອງ ຈຶ່ງຮູ້ວ່າ : ຜູ້ຖືກຫາຊື່ ທ້າວ ທອງສະຫວັນ (ເຈົ້າຂອງເຮືອນ ) ອາຍຸ 49 ປີ, ປະຊາຊົນ ຢູ່ ບ້ານຕານ, ທ້າວ ອຸດົມສັກ, ອາຍຸ 40 ປີ, ປະຊາຊົນ ຢູ່ບ້ານ ຈອມທອງ ແລະ ທ້າວ ຄຳສະຫວັນ, ຢູ່ບ້ານ ໂພນສະອາດ ທັງສາມຄົນຢູ່ເມືອງທ່າແຂກ, ແຂວງຄຳມ່ວນ. ນອກນັ້ນ, ທ້າວ ທອງສະຫວັນ ຍັງຮັບສາລະພາບຕື່ມອີກວ່າ : ຢາບ້າຈຳນວນດັ່ງກ່າວ ທີ່ຜູ້ກ່ຽວຊຸກ ເຊື່ອງໄວ້ໃນເຮືອນ ແມ່ນໄດ້ຊື້ມາຈາກ ທ້າວ ອ໋ອດ, ອາຍຸ 29 ປີ, ປະຊາຊົນບ້ານດອນລັບ, ເມືອງຫີນບູນ, ແຂວງຄຳມ່ວນ.
ຕົກມາຮອດວັນທີ 23 ພຶດສະພາທີ່ຜ່ານມາ, ທາງເຈົ້າໜ້າທີ່ ປກສ ເມືອງທ່າແຂກ ສາມາດນຳກັກຕົວທ້າວ ອ໋ອດ ໄດ້ຢູ່ທີ່ ໂຮງແຮມແຫ່ງໜຶ່ງ ພາຍໃນເທສະບານ, ເມືອງທ່າແຂກ, ແຂວງຄຳມ່ວນ. ຜ່ານມາພວກກ່ຽວທັງ 4 ຄົນແມ່ນໄດ້ຖືກຕ້ອງໂທດມາແລ້ວ ໃນຂໍ້ກ່າວຫາການຄ້າຂາຍ ແລະ ເສບຢາເສບຕິດ. ປະຈຸບັນຄະດີດັ່ງກ່າວ, ທາງເຈົ້າໜ້າທີ່ວິຊາສະເພາະ ຍັງທຳການສືບສວນ – ສອບສວນ ເພື່ອຂະຫຍາຍຜົນຫາກຸ່ມແກ້ງຜູ້ຮ່ວມຂະບວນການມາດຳເນີນຄະດີຕາມຂັ້ນຕອນຂອງກົດໝາຍ.
ຂ່າວ: Khammouane News