ຕອນບ່າຍວັນທີ 2 ກໍລະກົດ 2024 ນີ້, ຢູ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງຫຼວງພະບາງ ຈັດພິທີມອບ-ຮັບ ໜ້າທີ່ ເລຂາຄະນະພັກຮາກຖານ ຫົວໜ້າພະແນກກະສິກຳ ແລະ ປ່າໄມ້ແຂວງຫຼວງພະບາງ ລະຫວ່າງຜູ້ເກົ່າ ແລະ ຜູ້ໃໝ່ ໂດຍເປັນປະທານຂອງ ທ່ານ ສຸກັນ ບຸນຍົງ ຮອງເລຂາຄະນະບໍລິຫານງານພັກແຂວງ, ມີ ຫົວໜ້າ-ຮອງຫົວໜ້າພະແນກການ, ກົມກອງ ແລະຫົວໜ້າ-ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງ-ນະຄອນ ຫຼວງພະບາງ ເຂົ້າຮ່ວມ.
ໃນພິທີ ທ່ານ ສີວອນ ວົງຄຳຈັນ ຫົວໜ້າພະແນກກະສິກຳ ແລະ ປ່າໄມ້ ແຂວງຫຼວງພະບາງ ຜູ້ເກົ່າ ໄດ້ຜ່ານບົດສະຫຼຸບການຊີ້ນຳວຽກງານໃນໄລຍະຜ່ານມາ ຍົກໃຫ້ເຫັນບັນດາຜົນສຳເລັດ ຂອງບັນດາຂະແໜງການພາຍໃນພະແນກ, ອັນໄດ້ປະກອບສ່ວນການພັດທະນາເສດຖະກິດຂອງແຂວງນັບມື້ດີຂື້ນ, ເຫັນໄດ້ຈາກການຂະຫຍາຍຕົວຂອງວຽກງານປູກຝັງ-ລ້ຽງສັດ ທີ່ນຳໃຊ້ເຕັກນິກເຂົ້າຊ່ວຍນັບມື້ຫຼາຍຂື້ນ, ພື້ນຖານໂຄງລ່າງດ້ານກະສິກຳ ໄດ້ຮັບການປັບປຸງຍົກລະດັບ ເພື່ອຕອບສະໜອງໃຫ້ແກ່ການຜະລິດ, ຕິດພັນກັບການແກ້ໄຂຄວາມທຸກຍາກຂອງປະຊາຊົນ ສາມາດບັນລຸຕາມຄາດໝາຍທີ່ອົງການປົກຄອງແຂວງວາງໄວ້.
ຈາກນັ້ນ ທ່ານ ຄໍາຜູຍ ຈັນທະວະດີ ຮອງຫົວໜ້າຄະນະຈັດຕັ້ງແຂວງ, ໄດ້ຜ່ານມະຕິຕົກລົງ ຂອງຄະນະປະຈໍາພັກແຂວງ ແລະຂໍ້ຕົກລົງ ຂອງທ່ານເຈົ້າແຂວງ ວ່າດ້ວຍການຍົກຍ້າຍ- ທ່ານ ສີວອນ ວົງຄຳຈັນ ກຳມະການພັກແຂວງ ເລຂາຄະນະພັກຮາກຖານ ຫົວໜ້າພະແນກກະສິກຳ ແລະ ປ່າໄມ້ ໄປປະຈຳການຢູ່ສະພາປະຊາຊົນແຂວງຫຼວງພະບາງ ແລະແຕ່ງຕັ້ງ ທ່ານ ບຸນມີ ສະຫວັດ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ເປັນເລຂາພັກຄະນະພັກຮາກຖານ ແລະເປັນຫົວໜ້າພະແນກກະສິກຳ ແລະ ປ່າໄມ້ແຂວງຫຼວງພະບາງ. ໂອກາດນີ້ ໄດ້ຮັບຟັງບົດບັນທຶກການ ມອບ-ຮັບ ໜ້າທີ່ ພ້ອມທັງລົງນາມການມອບ-ຮັບໜ້າທີ່ ຢ່າງເປັນທາງການ, ຕອນທ້າຍ ທ່ານ ສຸກັນ ບຸນຍົງ ໄດ້ມີຄໍາເຫັນເນັ້ນໜັກໃຫ້ຜູ້ເຂົ້າຮ່ວມ, ພ້ອມກັນຮັບຮູ້ເຖີງການປັບປຸງ ລະບົບກົງຈັກການຈັດຕັ້ງໃນໄລຍະໃໝ່, ແມ່ນເພື່ອຕອບສະໜອງຄວາມຮຽກຮ້ອງຕ້ອງຂອງວຽກງານແຕ່ລະດ້ານ ໃຫ້ປະສົບຜົນສຳເລັດຕາມທິດທາງ ແລະຄາດໝາຍທີ່ວາງໄວ້, ພ້ອມນີ້ ທ່ານໄດ້ເນັ້ນໃຫ້ຜູ້ຮັບໜ້າທີ່ໃໝ່ ສືບຕໍ່ເພີ່ມທະວີຄວາມຮັບຜິດຊອບຂອງຕົນໃຫ້ສູງຂື້ນ ເພື່ອເຮັດໃຫ້ບັນດາຄາດໝາຍທີ່ໄດ້ກຳນົດໄວ້ ໃນແຕ່ລະຂະແໜງການ ບັນລຸຜົນສຳເລັດຕາມແຜນທີ່ວາງໄວ້.
ແຫຼ່ງຂ່າວ: ຂ່າວສານຫຼວງພະບາງ