ທ່ານ ນາງ ໃບຄໍາ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ຊີ້ແຈງຕໍ່ຄໍາຊັກຖາມຂອງຄະນະປະຈໍາສະພາແຫ່ງຊາດ ຕໍ່ ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ຄັ້ງວັນທີ 13 ມິຖຸນາ 2024 ກ່ຽວກັບການຄຸ້ມຄອງແຮງງານລາວທີ່ເຮັດວຽກຢູ່ຕ່າງປະເທດ ແມ່ນໄດ້ມີລະບຽບການໂດຍເລີ່ມຈາກການມີສັນຍາຮ່ວມມືກັບປະເທດຮັບ, ມີກົນໄກການຕິດຕາມ ແລະ ຄຸ້ມຄອງຂະບວນການ, ຂັ້ນຕອນ ໃນການຈັດຫາງານໄປຕ່າງປະເທດຢ່າງຮັດກຸມ ໄດ້ມີການປະສານສົມທົບ ກັບ ກະຊວງການຕ່າງປະເທດ ເພື່ອໃຫ້ສຳນັກງານຜູ້ຕາງໜ້າຂອງ ສປປ ລາວ ເຊັ່ນ: ສະຖານທູດ, ສະຖານກົງສູນ ຢູ່ປະເທດທີ່ມີແຮງງານລາວ ເຮັດວຽກຢູ່ ໃຫ້ການຕິດຕາມ, ປົກປ້ອງສິດຜົນປະໂຫຍດ ຂອງຜູ້ອອກແຮງງານລາວ ພ້ອມທັງໄດ້ແຕ່ງຕັ້ງພະນັກງານຄຸ້ມຄອງແຮງງານລາວ ໄປປະຈຳຢູ່ຕ່າງປະເທດຕາມຄວາມເໝາະສົມ.
ນອກນັ້ນ, ໃນກອບຮ່ວມມືອາຊຽນ ໄດ້ມີຖະແຫຼງການອາຊຽນກ່ຽວກັບການໂອນສິດຜົນປະໂຫຍດປະກັນສັງຄົມຂອງແຮງງານເຄື່ອນຍ້າຍໃນອາຊຽນ, ເຊິ່ງຖືກຮັບຮອງໃນກອງປະຊຸມສຸດຍອດອາຊຽນຄັ້ງທີ 40 ແລະ 41 ປີ 2022 ພ້ອມນີ້ ຍັງໄດ້ປຶກສາຫາລື ໃນບັນດາປະເທດ CLMTV ກ່ຽວກັບການຜັນຂະຫຍາຍຖະແຫຼງການດັ່ງກ່າວ ໃຫ້ສາມາດຈັດຕັ້ງປະຕິບັດຢ່າງເປັນຮູບປະທໍາໂດຍໄວ.
ມາຮອດປັດຈຸບັນ, ມີແຮງງານລາວອອກໄປເຮັດວຽກຢູ່ຕ່າງປະເທດແບບຖືກຕ້ອງ ຕາມກົດໝາຍ 212.795 ຄົນ ແລະ ແຮງງານທີ່ໄປແບບຜິດກົດໝາຍຈໍານວນ 203.161 ຄົນ ແລະ ສັງລວມເງິນ ທີ່ແຮງງານສົ່ງກັບຄືນປະເທດທັງໝົດ ປະມານ 52.110.961 ໂດລາ ຕໍ່ເດືອນ x 12 ເດືອນ ເທົ່າກັບ 625.331.532 ໂດລາຕໍ່ປີ.
ຂ່າວ: ປະຊາຊົນ