ຈາກການໃຫ້ສຳພາດຂອງທ່ານ ພັນໂທ ອຳພອນ ຄຳອຸ່ນທອນ ຮອງພະແນກຕຳຫຼວດຊີ້ນຳວຽກງານຕຳຫຼວດຈະລາຈອນ ເມືອງໄຊເສດຖາ, ນະຄອນຫຼວງວຽງຈັນ ໃນລາຍການວິທະຍຸຂັບຂີ່ປອດໄພ (ວັນທີ 24 ມິຖຸນາ 2024) ໄດ້ລາຍງານໃຫ້ຮູ້ວ່າ: ກ່ຽວກັບສາເຫດທີ່ພາໃຫ້ເກີດເຫດການຕຳກັນ 5 ຄັນຊ້ອນ, ເຂດບ້ານໂຊກນ້ອຍ, ເມືອງໄຊເສດຖາ, ນະຄອນຫຼວງວຽງຈັນ, ເມື່ອວັນທີ 20 ມິຖຸນາທີ່ຜ່ານມາແມ່ນເກີດຈາກ ລົດບັນທຸກໄດ້ເກີດຄວາມຂັດຂ້ອງທ່າງເຕັກນິກ(ເບກແຕກ) ຜູ້ຂັບຂີ່ໄດ້ຕັດສິນໃຈ ຫັກຫຼົບເຂົ້າແຄມທາງ ເພື່ອຫຼີກເວັ້ນຜົນເສຍຫາຍຫຼາຍກວ່ານັ້ນຄື: ຖ້າຫາກບໍ່ຫັກເຂົ້າແຄມທາງ ອາດຈະຕໍາເອົາລົດຈັກທາງໜ້າ ຫຼື ເສຍຫຼັກໄປຕຳເອົາລົດທີ່ຂີ່ສວນເລນມາ.
ດັ່ງນັ້ນ, ຈຶ່ງຫັກເຂົ້າແຄມທາງ ແຕ່ກໍຍັງຕຳເອົາລົດ 3 ຄັນທີ່ຈອດແຄມທາງ ແລະ ລົດທີ່ຂີ່ສວນທາງມາຈຳນວນ 1 ຄັນ, ລວມທັງໝົດເປັນ 5 ຄັນໃນອຸບັດຕິເຫດຄັ້ງນີ້, ຫຼັງຈາກເກີດເຫດການຂຶ້ນ ເຈົ້າໜ້າທີ່ກໍໄດ້ເອົາລົດທັງໝົດ ເຂົ້າມາດຳເນີນການສືບສວນສອບສວນຢ່າງລະອຽດ ແລະ ຈະແຈ້ງວ່າ ໃຜຈະເປັນຄົນຮັບຜິດຊອບແນວໃດແນ່ ຕໍ່ກັບອຸບັດຕິເຫດໃນຄັ້ງນີ້.
ຂ່າວ: ວສລ