ໃນວັນທີ 19 ມິຖຸນາທີ່ຜ່ານມາ, ຂ່າວ ປກສ ແຂວງຫົວພັນ ໄດ້ລາຍງານວ່າ: ສານປະຊາຊົນ ຂັ້ນຕົ້ນ ແຂວງຫົວພັນ ໄດ້ຕັດສິນປ່ອຍຕົວນັກໂທດກ່ອນກຳນົດໂດຍມີເງື່ອນໄຂ ຈຳນວນ 13 ຄົນ ທີ່ຄ້າຍຄຸມຂັງດັດສ້າງ ສູນວັງລົມ ປກສ ແຂວງຫົວພັນ, ເຊິ່ງປະກອບມີນັກໂທດຄະດີຢາເສບຕິດ 7 ຄົນ ແລະ ຄະດີລັກຊັບພົນລະເມືອງ 6 ຄົນ.
ການພິຈາລະນາປ່ອຍຕົວໃນຄັ້ງນີ້ແມ່ນຍ້ອນພວກເຂົາ ມີຄວາມຕັ້ງໃຈເຝິກຝົນຫຼໍ່ຫຼອມຢ່າງກ້າວໜ້າ, ມີການປ່ຽນແປງດ້ານທັດສະນະແນວຄິດການກະທຳ, ມີຄວາມຕື່ນຕົວ ເຄົາລົບປະຕິບັດກົດໝາຍ ແລະ ລະບຽບການຂອງຄ້າຍຄຸມຂັງດັດສ້າງ, ຍອມຮັບເອົາຄຳຕັດສິນຂອງສານທຸກຢ່າງ, ມີຄວາມຮູ້ສຶກກິນແໜງຕໍ່ການກະທຳຜິດທີ່ບໍ່ຖືກຕ້ອງຂອງຕົນໃນໄລຍະຜ່ານມາ, ມີຄວາມມັກຄີເປັນແບບຢ່າງທີ່ດີໃຫ້ແກ່ນັກໂທດຢູ່ຄ້າຍຄຸມຂັງ ແລະ ໄດ້ປະຕິບັດໂທດມາແລ້ວ 2/3 ຂອງສານຕັດສິນ. ດັ່ງນັ້ນ, ຈຶ່ງໄດ້ຕັດສິນປ່ອຍຕົວນັກໂທດຈຳນວນດັ່ງກ່າວ, ເພື່ອໃຫ້ໂອກາດກັບຄືນມາປັບປຸງຕົວໃນສັງຄົມ ແລະ ບໍ່ໃຫ້ກະທຳຜິດກົດໝາຍອີກ.
ຂ່າວ: ຂ່າວ ປກສ ແຂວງຫົວພັນ News