ເມື່ອບໍ່ດົນມານີ້, ໄດ້ມີການເຜີຍແຜ່ພາບໂຕະ-ຕັ້ງທີ່ເຮັດມາຈາກການຣີໄຊເຄິ້ລຂີ້ເຫຍື້ອປລາສຕິກຫຼາຍກວ່າ 500 ກິໂລກຣາມ ໃຫ້ແກ່ນ້ອງໆນັກຮຽນທີ່ແຂວງຫຼວງພຣະບາງ ຈຳນວນ 15 ຊຸດ, ຫຼ້າສຸດນີ້ພວກເຮົາກໍໄດ້ຮູ້ວ່າ: ທີມງານດັ່ງກ່າວແມ່ນໃຜ ແລະ ມີຄວາມຄິດລິເລີ່ມໂຄງການແນວໃດ, ມື້ນີ້ລາວໂພສໄດ້ເອົາຂໍ້ມູນມາໃຫ້ທຸກຄົນອ່ານໄປນຳກັນ.
ທີມ Precious Plastic Vientiane ແມ່ນກຸ່ມໄວໜຸ່ມທີ່ມີຄວາມສົນໃຈຕໍ່ກັບຂີ້ເຫຍື້ອປລາສຕິກ ແລະ ຢາກມີສ່ວນຮ່ວມໃນການແກ້ໄຂບັນຫາຂີ້ເຫຍື້ອປລາສຕິກໃນຊຸມຊົນ, ໂດຍໄດ້ແຮງບັນດານໃຈມາຈາກ Precious Plastic Global ທີ່ເປັນຕົ້ນແບບໃນການສ້າງຄຸນຄ່າຂອງປລາສຕິກ , ທີ່ຜ່ານມາພວກເຮົາໄດ້ຮັບທຶນການດຳເນີນໂຄງການຈາກ UNFPA Laos, YSEALI Enviro-Tech ແລະ ຜູ້ໃຫ້ທຶນລ່າສຸດທີ່ເຮັດໃຫ້ພວກເຮົາໄດ້ ເຮັດໂຕະຕັ່ງໄປບໍລິຈາກໃຫ້ນ້ອງໆນັກຮຽນກໍຄື YSEALI SUMMIT 2023 Young Southeast Asian Leaders Initiative.
ໃນການລົງຈັດກິດຈະກຳ “ໂຕະຕັ່ງເພື່ອນ້ອງ” ໃນຄັ້ງນີ້ພວກເຮົາ Precious Plastic Vientiane ຮູ້ສຶກພາກພູມໃຈຢ່າງສູງ ທີ່ໄດ້ເປັນສ່ວນໜຶ່ງໃນການມອບໂອກາດໃຫ້ແກ່ນ້ອງໆ ແລະ ຍັງໄດ້ເປັນສ່ວນໜຶ່ງທີ່ສາມາດຫຼຸດຜ່ອນຂີ້ເຫຍື້ອພລາສຕິກ ພ້ອມທັງນຳພວກມັນມາຣີໄຊໂຄຣ ໃຫ້ເກີດປະໂຫຍດສູງສຸດ.
ນອກນີ້, ທາງທີມ Precious Plastic Vientiane ຂໍສະແດງຄວາມຂອບໃຈຢ່າງສູງຕໍ່ກັບອົງກອນ “PatiHoub” ທີ່ໄດ້ເປັນພາກສ່ວນຫຼັກທີ່ໃຫ້ຄວາມຮ່ວມມືໃນການ ນຳເອົາປລາສຕິກໄປ ລີໄຊໂຄຣເປັນໂຕະຕັ່ງທີ່ສວຍງາມຕາມຮູບພາບ.