ທ່ານ ພອນທິບ ພະບໍລິບູນ ທີ່ປຶກສາປະຈໍາໂຄງການເສັ້ນທາງເລກ 8 ໄດ້ກ່າວຕໍ່ຜູ້ສື່ຂ່າວທ້ອງຖິ່ນວ່າງບໍ່ດົນນີ້ຕໍ່ກັບການຟູຟື້ນປົວແປງສະພາບເສັ້ນທາງເລກ 8 ພາຍຫຼັງໄດ້ຮັບກະທົບຈາກໄພພິບັດທາງທໍາມະຊາດໃນຊ່ວງລະດູຝົນຂອງປີ 2023 ຜ່ານມາວ່າ : ສໍາລັບສະພາບການປົວແປງເສັ້ນທາງເລກ 8 ນີ້ບໍລິສັດແມ່ນໄດ້ສົ່ງທີມງານເຂົ້າມາຈັດຕັ້ງປະຕິບັດນັບແຕ່ວັນທີ 07 ຂອງເດືອນມີນາຈົນມາຮອດປະຈຸບັນ . ສ່ວນວ່າຈຸດທີ່ຈະຕ້ອງໄດ້ມີການກໍ່ສ້າງສ້ອມແປງຄືນແມ່ນນັບແຕ່ກິໂລແມັດ 42 + 800 – 50 + 800 ລວມໄລຍະທາງທີ່ຈະຕ້ອງສ້ອມແປງແມ່ນ 8 ກິໂລແມັດ ແລະ ຈຸດທີ່ເປັນບວກເປັນຂຸມແມ່ນກິໂລແມັດ 52 + 200 – 52+325 ແລະ 50 ແມັດ.
ສໍາລັບການປະຕິບັດວຽກຂອງທາງບໍລິສັດແມ່ນມີກົນຈັກທີ່ເຂົ້າມາປະຈໍາ 23 ຄັນ,ທີມງານສໍາຫຼວດລວມທັງໝົດ 7 ຄົນ ,ວຽກພາກສະຫຼຸບ,ວຽກສໍາຫຼວດ – ອອກແບບ ແລະ ໄດ້ທໍາການກໍ່ສ້າງໄປພ້ອມໆກັນ . ມາຮອດປະຈຸບັນໜ້າວຽກມີຄວາມຄືບໜ້າໂດຍຈຸດຫຼັກໆແມ່ນເລັງເອົາດິນທີ່ເຈື່ອນ ແລະ ຈຸດທີ່ມີຄວາມຫຍຸ້ງຍາກໃນການສັນຈອນໃນຊວງລະດູຝົນນີ້ເຊິ່ງໄດ້ເຫັນເຖິງຄວາມສໍາຄັນໃນຂົນສົ່ງສິນຄ້າ . ສະພາບຂອງເສັ້ນທາງແມ່ນເລັ່ງໃສ່ແກ້ໄຂວຽກຫຼັກໆໂດຍສະເພາະການສັນຈອນໄປມາເປັນອັນທໍາອິດເພື່ອໃຫ້ມີຄວາມສະດວກ , ໃນໄລຍະຂອງການກໍ່ສ້າງອາດຈະສົ່ງຜົນກະທົບການຕໍ່ການເດີນທາງເຊິ່ງທ່ານກໍ່ໄດ້ຮຽກຮ້ອງມາຍັງຜູ້ສັນຈອນເສັ້ນທາງດັ່ງກ່າວຈົ່ງໄດ້ເຫັນໃຈນໍາກັນ
ທ່ານໃຫ້ຮູ້ອີກວ່າ : ການກໍ່ສ້າງຕາມແຜນແມ່ນມີໄລຍະເວລາ 02 ປີແຕ່ກໍ່ຈະພະຍາ ຍາມປັບໄລຍະເວລາລົງມາໃຫ້ຍັງເຫຼືອ 1 ປີກັບ 3 ເດືອນທັງນີ້ແມ່ນຕ້ອງໄດ້ເບິ່ງຕາມສະພາບຄວາມເປັນຈິງຖ້າຫາກດິນຟ້າອາກາດເອື້ອອໍານວຍໃນຊ່ວງການກໍ່ສ້າງ.
ໃນເວລາການກໍ່ສ້າງແມ່ນມີທັງຂໍ້ສະດວກ ແລະ ຂໍ້ຫຍຸ້ງຍາກເຊິ່ງໜຶ່ງໃນບັນຫາຂໍ້ສະດວກແມ່ນທາງບໍລິສັດແມ່ນທີມງານທີ່ຄົບຊຸດລວມໄປເຖິງພາກສ່ວນທີ່ກ່ຽວຂ້ອງກໍ່ໄດ້ອໍານວຍຄວາມສະດວກໃຫ້,ສ່ວນວ່າຂໍ້ຫຍຸ້ງຍາກໃນ ການກໍ່ສ້າງແມ່ນການເຄື່ອນຍ້າຍດິນທີ່ຖືກເຈາະເຈື່ອນແມ່ນມີໄລຍະໄກ ແລະ ປະລິມານການສັນຈອນມີລົດຫຼາຍ.
ຂ່າວ: ແຂວງຄຳມ່ວນ