ສຳນັກຂ່າວຕ່າງປະເທດລາຍງານໃນວັນທີ 17 ມິຖຸນາ 2024 ນີ້ກ່ຽວກັບກໍລະນີທີ່ພໍ່ແລະແມ່ ໃຫ້ລູກອາຍຸ 1 ປີ 7 ເດືອນດື່ມນ້ຳກະທ່ອມ ແລະ ສູບຢາສູບໄຟຟ້າ ເຊິ່ງໄດ້ຖ່າຍຄລິບວີດີໂອແລ້ວໂພສລົງສື່ສັງຄົມອອນລາຍ ເຫດການດັ່ງກ່າວເກີດຂຶ້ນທີ່ປະເທດໄທ ເຊິ່ງຫຼ້າສຸດແມ່ຂອງເດັກນ້ອຍໄດ້ອອກມາຍອມຮັບວ່າ: ໃຫ້ລູກສູບຢາສູບໄຟຟ້າແທ້ ເຊິ່ງທາງດ້ານເຈົ້າໜ້າທີ່ ກະຊວງການພັດທະນາສັງຄົມ ແລະ ຄວາມໝັ້ນຄົງຂອງມະນຸດ ແຫ່ງປະເທດໄທ ໄດ້ເຂົ້າຊ່ວຍເຫຼືອແລ້ວ ແລະ ໄດ້ເຂົ້າແຈ້ງຄວາມດຳເນີນຄະດີຕໍ່ຜູ້ປົກຄອງ.
ຕາມການລາຍງານເບື້ອງຕົ້ນ: ຜູ້ປົກຄອງຂອງເດັກນ້ອຍທີ່ເປັນແມ່ອາຍຸ 17 ປີຍອມຮັບວ່າ: ລູກໄດ້ສູບຢາສູບໄຟຟ້າຕາມຄລິບວີດີໂອແທ້ ເຊິ່ງໄດ້ເລີ່ມສູບມາ 5 ເດືອນແລ້ວ ຕັ້ງແຕ່ອາຍຸ 1 ປີ ກັບ 2 ເດືອນ ໂດຍອ້າງວ່າເປັນການສູບໂດຍການສະມັກໃຈບໍ່ໄດ້ບັງຄັບ ຫາກບໍ່ໃຫ້ສູບລູກຈະຮ້ອງໄຫ້ ສ່ວນຄລິບທີ່ເຜີຍແຜ່ໃນສື່ສັງຄົມອອນລາຍແມ່ຂອງເດັກນ້ອຍໄດ້ບອກວ່າຮູ້ເທົ່າບໍ່ເຖິງການ.
ທາງດ້ານແພດໂຮງໝໍຮາມາທິບໍດີກ່າວວ່າ: ເດັກນ້ອຍທີ່ມີອາຍຸ 1 ປີສະໝອງຍັງມີການເຕີບໃຫຍ່ຂະຫຍາຍຕົວ ພໍໄດ້ຮັບສານນິໂຄຕິນໃນຢາສູບໄຟຟ້າ ຈະທຳລາຍການພັດທະນາຂອງສະໝອງເຊິ່ງຈະມີປັນຫາໄລຍະຍາວ ແລະ ຍັງມີປະຊາຊໍົນອີກຈຳນວນຫຼາຍ ທີ່ຍັງບໍ່ຮູ້ໂທດຂອງຢາສູບໄຟຟ້າໂດຍສະເພາະຜູ້ປົກຄອງ ຕ້ອງມີຄວາມຮູ້ເພື່ອຮັບມື ແລະ ຄວນຮີບເລັ່ງແກ້ໄຂບັນຫາໄລຍະຍາວ ເພື່ອບໍ່ໃຫ້ເກີດເຫດການລັກສະນະນີ້ໃນຄອບຄົວອື່ນ.
ດັ່ງນັ້ນ, ຈຶ່ງຝາກເຕືອນໃຫ້ພໍ່ແມ່ພີ່ນ້ອງຜູ້ທີ່ມີລູກນ້ອຍ ຫຼື ເດັກຄວນໃຫ້ຫຼີກຫຼ່ຽງຈາກຢາສູບໄຟຟ້າເນື່ອງຈາກເຮັດໃຫ້ເປັນໂຣກຫົວໃຈ, ຫຼອດເລືອດເປັນມະເຮັງ ແລະ ສົ່ງຜົນຕໍ່ການພັດທະນາຂອງສະໝອງຂອງເດັກນ້ອຍໃນໄລຍະຍາວອີກດ້ວຍ.
ແຫຼ່ງຂ່າວ: ໄທພີບີເອສ