ທ່ານ ທິບພະວອນ ສີລາຊາ ປະທານບໍລິສັດວີແອພີ ພັດທະນາກໍ່ສ້າງຈຳກັດຜູ້ດຽວເປັນບໍລິສັດຮັບເໝົາກໍ່ສ້າງ ໄດ້ລາຍງານໃຫ້ຮູ້ວ່າ: ໂຄງ ການກໍ່ສ້າງຂົວຂ້າມເຊລະນອງ, ເຂດບ້ານຕະກໍ ຫາບ້ານອາລັອງ, ເມືອງນອງ, ແຂວງສະຫວັນນະເຂດ ມີຄວາມຍາວ 175 ແມັດ, ກວ້າງ 5,5 ແມັດ, ເປັນຂົວເບຕົງອັດແຮງ, ມີມູນຄ່າການກໍ່ສ້າງທັງໝົດເກືອບ 40 ຕື້ກີບ, ເຊິ່ງແມ່ນງົບປະມານການລົງທຶນຂອງລັດ ທີ່ສະພາແຫ່ງຊາດອະນຸມັດໃນປີ 2024 ແລະ ເງິນເກີນແຜນຂອງແຂວງສະຫວັນນະເຂດສົມທົບ.
ໂຄງການກໍ່ສ້າງຂົວຂ້າມເຊລະນອງ ໄດ້ເລີ່ມລົງມືກໍ່ສ້າງໃນທ້າຍເດືອນພຶດສະພາ 2024 ແລະ ຈະໃຫ້ສຳເລັດພາຍໃນ 2 ປີ(ເດືອນ 5/2026), ປັດຈຸບັນ, ສາມາດປະຕິບັດໄດ້ແລ້ວ 15% ເຊິ່ງໜ້າວຽກທີ່ໄດ້ຈັດຕັ້ງປະຕິບັດແລ້ວມີ: ກໍ່ສ້າງທາງເວັ້ນ, ຕັດດິນ, ຖົມດິນກໍ່ສ້າງທາງເຂົ້າຂົວ ແລະ ບຸກເບີກສະຖານທີ່ກໍ່ສ້າງ.
ຖ້າຫາກໂຄງການດັ່ງກ່າວສຳເລັດ ຈະເຮັດໃຫ້ປະຊາຊົນໃນຈຳນວນ 10 ບ້ານໄດ້ຊົມໃຊ້ຄື: ບ້ານຄຸ້ມສົງ, ບ້ານສະວຶ, ບ້ານຕະຫຼິງ, ບ້ານອາລັອງ, ບ້ານປໍນອງ, ບ້ານອາລາມ, ບ້ານຕັງອາໄລນ້ຳ, ບ້ານຕັງອາໄລເໜືອ, ບ້ານຕານປະໂຕ່ຍ, ບ້ານແສນ ແລະ ບ້ານຕະລຸງ, ລວມມີປະຊາກອນທັງໝົດ 90,000 ກວ່າຄົນ ໄດ້ຮັບຜົນປະໂຫຍດ ແລະ ຈະກາຍເປັນອີກເສັ້ນທາງຄົມມະນາຄົມໜຶ່ງທີ່ສາມາດເຊື່ອມຕໍ່ແຕ່ເມືອງນອງ, ແຂວງສະຫວັນນະເຂດໄປຫາເມືອງຕະໂອ້ຍ ແຂວງສາລະວັນ, ມີຄວາມຍາວ 43 ກິໂລແມັດ.
ຂ່າວ: ສະຫວັນນະເຂດ, ວສລ