ມາຮອດປັດຈຸບັນ, ມີແຮງງານລາວອອກໄປເຮັດວຽກຢູ່ຕ່າງປະເທດ ແບບຖືກຕ້ອງຕາມກົດຫມາຍ 212,795 ຄົນ ແລະ ແຮງງານທີ່ໄປແບບຜິດກົດໝາຍຈໍານວນ 203.161 ຄົນ. ສັງລວມເງິນທີ່ແຮງງານສົ່ງກັບຄືນປະເທດທັງໝົດ ປະມານ 52,110,961 ໂດລາສະຫະລັດຕໍ່ເດືອນ x 12 ເດືອນ ເທົ່າກັບ 625,331,532 ໂດລາສະຫະລັດຕໍ່ປີ.
ໃນໂອກາດຂຶ້ນຊີ້ແຈງຕໍ່ຄໍາຊັກຖາມຂອງສະມາຊິກສະພາແຫ່ງຊາດ ຢູ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 13 ມິຖຸນາ 2024 ທ່ານ ນາງ ໃບຄໍາ ຂັດທິຍະ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ: ສໍາລັບການຄຸ້ມຄອງແຮງງານລາວທີ່ເຮັດວຽກຢູ່ຕ່າງປະເທດ ແມ່ນໄດ້ມີລະບຽບການໃນການສົ່ງອອກແຮງງານລາວ ເພື່ອໄປເຮັດວຽກຢູ່ຕ່າງປະເທດ ໂດຍເລີ່ມຈາກການມີສັນຍາຮ່ວມມືກັບປະເທດຮັບ, ມີກົນໄກການຕິດຕາມ ແລະ ຄຸ້ມຄອງຂະບວນການ, ຂັ້ນຕອນໃນການຈັດຫາງານໄປຕ່າງປະເທດຢ່າງຮັດກຸມ ໄດ້ມີການປະສານສົມທົບກັບກະຊວງການຕ່າງປະເທດ ເພື່ອໃຫ້ສຳນັກງານຜູ້ຕາງໜ້າຂອງ ສປປ ລາວ ເຊັ່ນ: ສະຖານທູດ, ສະຖານກົງສູນຢູ່ປະເທດທີ່ມີແຮງງານລາວເຮັດວຽກຢູ່ໃຫ້ການຕິດຕາມ, ປົກປ້ອງສິດຜົນປະໂຫຍດຂອງຜູ້ອອກແຮງງານລາວ ພ້ອມທັງໄດ້ແຕ່ງຕັ້ງພະນັກງານຄຸ້ມຄອງແຮງງານລາວ ໄປປະຈຳຢູ່ຕ່າງປະເທດຕາມຄວາມເໝາະສົມ.
ນອກຈາກນີ້ ໃນກອບຮ່ວມມືອາຊຽນ ໄດ້ມີຖະແຫຼງການອາຊຽນ ກ່ຽວກັບການໂອນສິດຜົນປະໂຫຍດປະກັນສັງຄົມຂອງແຮງງານເຄື່ອນຍ້າຍໃນອາຊຽນ ຊຶ່ງຖືກຮັບຮອງໃນກອງປະຊຸມ ສຸດຍອດອາຊຽນ ຄັ້ງທີ 40 ແລະ 41 ປີ 2022 ພ້ອມນີ້ ຍັງໄດ້ປຶກສາຫາລືໃນບັນດາປະເທດ CLMTV ກ່ຽວກັບການຜັນຂະຫຍາຍຖະແຫຼງການດັ່ງກ່າວ ໃຫ້ສາມາດຈັດຕັ້ງປະຕິບັດຢ່າງເປັນຮູບປະທໍາໂດຍໄວ.
ທີ່ມາ: LNR