ກົມຕຳຫຼວດຈາລະຈອນ ໄດ້ລາຍງານສະພາບການເກີດອຸບັດເຫດທົ່ວປະເທດປະຈຳເດືອນພຶດສະພາ 2024 ທີ່ຜ່ານມາ ວ່າ: ສະເພາະເດືອນພຶດສະພາ 2024 ທີ່ຜ່ານມາ, ແຂວງຈໍາປາສັກ ເກີດອຸບັດເຫດ ແລະ ມີຜູ້ເສຍຊີວິດຫຼາຍກວ່າແຂວງອື່ນໆໃນຂອບເຂດທົ່ວປະເທດ ຊຶ່ງມີຈໍານວນຜູ້ເສຍຊີວິດເຖິງ 13 ຄົນ ຈາກອຸບັດເຫດທີ່ເກີດຂຶ້ນ 93 ຄັ້ງ, ຮອງລົງມາແມ່ນ ນະຄອນຫຼວງວຽງຈັນ ມີຜູ້ເສຍຊີວິດ 10 ຄົນ ຈາກອຸບັດເຫດທີ່ເກີດຂຶ້ນ 87 ຄັ້ງ ແລະ ແຂວງອື່ນໆອີກ.
ໃນໄລຍະເດືອນພຶດສະພາ 2024 ຜ່ານມານີ້, ທົ່ວປະເທດລາວ ມີຜູ້ເສຍຊີວິດເຖິງ 77 ຄົນ, ມີຜູ້ບາດເຈັບ 799 ຄົນ ແລະ ມີພາຫະນະເປ່ເພ 889 ຄັນ ຈາກອຸບັດເຫດເກີດຂຶ້ນທັງໝົດ 513 ຄັ້ງ, ແຕ່ເມື່ອທຽບໃສ່ກັບຈຳນວນຜູ້ເສຍຊີວິດໃນເດືອນເມສາທີ່ຜ່ານມາແມ່ນຫຼຸດລົງ 19 ຄົນ ຊຶ່ງມີຜູ້ເສຍຊີວິດ 96 ຄົນ.
ສະພາບອຸບັດເຫດຕາມທ້ອງຖະໜົນໃນຂອບເຂດທົ່ວປະເທດ ແມ່ນຍັງໜ້າເປັນຫ່ວງ ເຖິງແມ່ນວ່າເຈົ້າໜ້າທີ່ຕໍາຫຼວດຈະໃຊ້ມາດຕະການຕ່າງໆເພື່ອຫຼຸດຜ່ອນອຸບັດເຫດກໍຕາມ, ຊຶ່ງສາຍເຫດທີ່ພາໃຫ້ເກີດອຸບັດເຫດແຕ່ລະຄັ້ງ ສ່ວນໃຫຍ່ເກີດຈາກການລະເມີດກົດລະບຽບການສັນຈອນຂອງຜູ້ຂັບຂີ່ ໂດຍສະເພາະຂັບຂີ່ໄວເກີນກຳນົດ, ດື່ມສິ່ງມຶນເມົາ ແລະ ອື່ນໆ, ໃນນັ້ນ ອຸບັດເຫດສ່ວນໃຫຍ່ແມ່ນເກີດຂຶ້ນ ນັບແຕ່ເວລາ 17:00-24:00 ໃນກຸ່ມອາຊີບກໍາມະກອນ ແລະ ກຸ່ມນັກຮຽນນັກສຶກສາ.
ຂໍ້ມູນ: ກົມຕຳຫຼວດຈາລະຈອນ