ວັນທີ 11 ມິຖຸນາ ທີ່ຜ່ານມາ, ທ່ານ ອຸດົມ ວົງໄກສອນ, ສສຊ ຈາກເຂດເລືອກຕັ້ງທີ 11 ແຂວງບໍລິຄໍາໄຊ ໄດ້ປະກອບຄໍາເຫັນໃສ່ບົດລາຍງານຂອງລັດຖະບານ ຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ວ່າ: ຈາກການລາຍງານຂອງພາກສ່ວນທີ່ກ່ຽວຂ້ອງເຫັນວ່າ ໄລຍະຜ່ານມາຍັງປາກົດເຫັນການລະເມີດລະບຽບກົດໝາຍ, ມີການສວຍໂອກາດໃຊ້ໜ້າທີ່ຕໍາແໜ່ງຫາຜົນປະໂຫຍດສ່ວນຕົວ ແຕ່ການແກ້ໄຂຍັງບໍ່ທັນເດັດຂາດ, ເຮັດໃຫ້ເກີດການສໍ້ລາດບັງຫຼວງໃນຫຼາຍລະດັບ, ສ້າງຄວາມເສຍຫາຍຫຼາຍພັນຕື້ກີບຕໍ່ປີ, ທັງສົ່ງຜົນກະທົບຕໍ່ການພັດທະນາເສດຖະກິດຂອງປະເທດ ກໍຄື ການດໍາລົງຊີວິດຂອງພະນັກງານ, ທະຫານຕໍາຫຼວດ ແລະ ປະຊາຊົນລາວບັນດາເຜົ່າ.
ຕໍ່ບັນຫາດັ່ງກ່າວ, ສະເໜີໃຫ້ລັດຖະບານຈິງຈັງ ແລະ ຈິງໃຈແກ້ໄຂບັນຫາເຄັ່ງຮ້ອນນີ້ຕາມກົດໝາຍ ແລະ ນິຕິກໍາກ່ຽວຂ້ອງທີ່ໄດ້ວາງອອກຢ່າງເຂັ້ມງວດທີ່ສຸດ, ແຕ່ລະກະຊວງ ແລະ ທ້ອງຖິ່ນຕ້ອງນໍາໄປຜັນຂະຫຍາຍເປັນມາດຕະ ການສະເພາະຂອງຕົນ ໂດຍການກໍານົດຊັດເຈນວ່າຈະແກ້ຮອດມື້ໃດໃນແຕ່ລະໄລຍະ, ເຫດເກີດຢູ່ບ່ອນໃດ ບ່ອນນັ້ນຕ້ອງເປັນເຈົ້າການແກ້ໄຂ. ຖ້າຫາກບໍ່ຈິງຈັງແກ້ໄຂ ແລະ ແກ້ໄຂບັນຫາການສໍ້ລາດບັງຫຼວງ ລາວເຮົາກໍຈະຍັງຢູ່ຫ່າງໄກກັບຄໍາວ່າພັດທະນາ ໂດຍເບິ່ງບົດຮຽນຈາກປະເທດເພື່ອນມິດໃກ້ຄຽງທີ່ພັດທະນາຍ້ອນເຂົາເຈົ້າເອົາຈິງເອົາຈັງແທ້ໆ ຕໍ່ການແກ້ໄຂການສໍ້ລາດບັງຫຼວງ.
ຂ່າວ: FM90