ທ່ານ ພອນສານ ວິໄລເມັ້ງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ປະກອບຄໍາເຫັນຢູ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 11 ມິຖຸນາ ທີ່ຜ່ານມາວ່າ: ໄລຍະຜ່ານມາ, ລັດຖະບານ ໄດ້ອອກຫຼາຍນິຕິກໍາທີ່ກ່ຽວຂ້ອງກັບການປະຢັດ ແລະ ຕ້ານການຟູມເຟືອຍ.
ແຕ່ຜ່ານການຕິດຕາມຕົວຈິງມາຮອດປັດຈຸບັນ, ອົງການຈັດຕັ້ງພັກ-ລັດ ແລະ ອົງການປົກຄອງແຕ່ລະຂັ້ນຍັງບໍ່ທັນເປັນເຈົ້າການຈັດຕັ້ງປະຕິບັດບັນດາມາດຕະການທີ່ວາງອອກໄດ້ດີເທົ່າທີ່ຄວນ, ສະແດງອອກໃນການຈັດງານສັງສ້ນ, ງານພົບປະ, ງານລ້ຽງ ແລະ ອື່ນໆ, ຍັງດໍາເນີນແບບປົກກະຕິ ແລະ ໃຊ້ເວລາໃນການກິນລ້ຽງຊຸມແຊວດົນ, ເຮັດໃຫ້ການໃຊ້ຈ່າຍງົບປະມານຂອງລັດໃນດ້ານນີ້ຍັງຟູມເຟືອຍ.
ທ່ານຍັງໄດ້ກ່າວ ກ່າວຕື່ມວ່າ: ບັນດາປະເທດທີ່ພັດທະນາແລ້ວ, ເຂົາເຈົ້າກໍານົດເວລາໃນການກິນລ້ຽງພຽງ 2 ຊົ່ວໂມງເທົ່ານັ້ນ ແລະ ຫຼຸດຜ່ອນການດື່ມສິ່ງມຶນເມົາຕ່າງໆ ລົງ, ເຊິ່ງບັນຫານີ້ ລາວເຮົາຄວນຖືເອົາເປັນແບບຢ່າງເພື່ອເຮັດໃຫ້ການຈັດຕັ້ງປະຕິບັດມາດຕະການປະຢັດ ແລະ ຕ້ານການຟູມເຟືອຍໃຫ້ດີກວ່າເກົ່າ.
ຂ່າວ: ວສລ