ສຳນັກຂ່າວຕ່າງປະເທດລາຍງານໃນວັນທີ 11 ມິຖຸນາ 2024 ເວລາປະມານ 04.30 ໂມງເຊົ້າໄດ້ເກີດເຫດໄຟໄໝ້ບໍລິເວນຕະຫຼາດຈະຕຸຈັກ ເສັ້ນທາງກຳແພງເພັດ ກຸງເທບມະຫານະຄອນ ປະເທດໄທ ເຮັດໃຫ້ຮ້ານຂາຍສັດລ້ຽງ-ປາສວຍງາມ ໄດ້ຮັບຄວາມເສຍຫາຍຫຼາຍກວ່າ 118 ຮ້ານ ແລະ ພົບຊາກສັດຕາຍຫຼາຍກວ່າ 1000 ໂຕ.
ຈາກການສອບຖາມເບື້ອງຕົ້ນ 1 ໃນເຈົ້າຂອງຮ້ານທີ່ໄດ້ຮັບຄວາມເສຍຫາຍໄດ້ລະບຸວ່າ: ພະນັກງານ ຫຼື ເຈົ້າຂອງຮ້ານໄດ້ໂດດໜີຕາຍກັນຈາກຊັ້ນເທິງຫຼັງຈາກເຫັນຄວັນ ພ້ອມເປີດເຜີຍວ່າ: ເຫດການໄຟໄໝ້ໄດ້ເກີດຂຶ້ນທີ່ຮ້ານຂາຍນົກ (ເກົ່າ) ກ່ອນມາປ່ຍນເປັນຮ້ານຂາຍໝາພັນນ້ອຍເຊັ່ນ: ພຸດເດີ້ນ, ຊິສຸ ໂດຍເຈົ້າຂອງຮ້ານຂາຍກັນເອງບໍ່ມີລູກຈ້າງ ເຊິ່ງຕອນກາງຄືນຈະຕ້ອງໄດ້ເປີດພັດລົມໃຫ້ໝາທັງຄືນ ຄາດວ່າເກີດໄຟຟ້າຫັດວົງຈອນ ເຮັດໃຫ້ເກີດເຫດດັ່ງກ່າວ.
ສຳລັບສັດລ້ຽງພາຍໃນຮ້ານທີ່ໄດ້ຮັບຄວາມເສຍຫາຍປະກອບມີ: ປາສວຍງາມ, ແມວ, ໝາ, ສັດແປກເຊັ່ນ: ຫົງ, ນົກ, ລິງ ເຊິ່ງນຳເຂົ້າຈາກຕ່າງປະເທດ ເຊິ່ງມີລາຄາຫຼັກໝື່ນບາດ ຈົນເຖິງ ຫຼັກແສນບາດ ມູນຄ່າລວມຫຼາຍລ້ານບາດແຕ່ເຫດການດັ່ງກ່າວໂຊກດີທີ່ບໍ່ມີໃຜໄດ້ຮັບບາດເຈັບ.
ເບື້ອງຕົ້ນທາງເຈົ້າໜ້າທີ່ສຳນັກງານຈະຕຸຈັກ ໄດ້ລົງກວດສອບພື້ນທີ່ ແລະ ໃຫ້ແຕ່ລະຮ້ານລົງທະບຽນ ແລະ ລວມມູນຄ່າຄວາມເສຍຫາຍຂອງແຕ່ລະຮ້ານ ພ້ອມທັງລໍຖ້າເຈົ້າໜ້າທີ່ພິສູດຫຼັກຖານເຂົ້າມາກວດສອບສາເຫດທີ່ແທ້ຈິງຕໍ່ໄປ.
ແຫຼ່ງຂ່າວ: ຂ່າວສົດ