ພິທີຖະແຫຼງຂ່າວການແຂ່ງຂັນກິລາເທຄວັນໂດ ລາຍການດັ່ງກ່າວ ຈັດຂຶ້ນໃນຕອນບ່າຍວັນທີ 6 ມິຖຸນາທີ່ຜ່ານມາ, ໃຫ້ກຽດເຂົ້າຮ່ວມໂດຍ ທ່ານ ກະເສມ ອິນທະລາ ຮອງເລຂາທິການ ຄະນະກຳມະການໂອແລມປິກແຫ່ງຊາດລາວ, ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ຫຼື ນວ, ທ່ານ ປະສາດໄຊ ພິລາພັນເດຊ ປະທານສະຫະພັນກິລາເທຄວັນໂດແຫ່ງຊາດລາວ ແລະ ທ່ານ ທະນູສັກ ພົມມະຈັກ ຜູ້ອໍານວຍການ ບໍລິສັດ ອໍໂຕລາວ ຈຳກັດ ພ້ອມດ້ວຍຕາງໜ້າບໍລິສັດ ເບຍລາວ ຈຳກັດ, ບັນດາພາກສ່ວນຜູ້ສະໜັບສະໜູນ ຕະຫຼອດຮອດຄູຝຶກ ແລະ ນັກກິລາຈາກ 22 ສະໂມສອນເຂົ້າຮ່ວມ.
ໃນພິທີ, ທ່ານ ປອ ຈັນທະວົງ ປັນຍາສິລະ ເລຂາທິການ ສະຫະພັນກິລາເທຄວັນໂດແຫ່ງຊາດລາວ ກ່າວວ່າ: ລາຍການດັ່ງກ່າວ ສະຫະພັນເທຄວັນໂດແຫ່ງຊາດລາວ ຈະໄດ້ຈັດການແຂ່ງຂັນຂຶ້ນ ລະຫວ່າງວັນທີ 15-16 ມິຖຸນາ 2024 ທີ່ສູນບູໂດເຊັນເຕີ ລາວ-ຍີ່ປຸ່ນ, ເຊິ່ງປັດຈຸບັນມີ 22 ພາກສ່ວນ ຈາກນັກກິລາທັງໝົດ 300 ກວ່າຄົນຈະເຂົ້າຮ່ວມ ແລະ ຈະມີການຊີງໄຊທັງໝົດ 153 ຫຼຽນຄຳ, 153 ຫຼຽນເງິນ ແລະ 306 ຫຼຽນທອງ, ໃນນັ້ນ ປະເພດຕໍ່ສູ້ ມີ 66 ລາຍການ ແລະ ປະເພດປຸ້ມເຊ້ 57 ລາຍການ.
ຂ່າວ: ສົງການ ພັນແພງດີ