ເມື່ອບໍ່ດົນມານີ້ ທີ່ກອງບັນຊາການ ປກສ ເມືອງປາກທາ ໄດ້ຈັດພິທີ ມອບອາວຸດລ່າເນື້ອ ແລະ ຈັກສະຕິນ ໃຫ້ກັບ ປກສ ແຂວງບໍ່ແກ້ວ ໂດຍການເຂົ້າຮ່ວມ ຂອງທ່ານ ສຸໄລ ດວງຜາຄໍາ ກໍາມະການພັກແຂວງ, ເລຂາພັກເມືອງ ເຈົ້າເມືອງປາກທາ, ມີຄະນະຮັບຜິດຊອບຈາກກອງບັນຊາການ ປກສ ແຂວງ, ສອງກອງບັນຊາການປ້ອງກັນຊາດ-ປ້ອງກັນຄວາມສະຫງົບ ເມືອງ, ປກສ ກຸ່ມບ້ານ ຕະຫຼອດຮອດນາຍ ແລະ ພົນຕໍາຫຼວດເຂົ້າຮ່ວມ.
ໂດຍປະຕິບັດຕາມຂໍ້ຕົກລົງຂອງທ່ານ ເຈົ້າເມືອງປາກທາ ສະບັບເລກທີ 224 /ຈມ,ປທ ລົງວັນທີ 17 ສິງຫາ 2023 ວ່າດ້ວຍການແຕ່ງຕັ້ງ ຄະນະກອງເລຂາ ເກັບກໍາຂຶ້ນບັນຊີ ອາວຸດເສິກ, ອາວຸດລ່າເນື້ອ ແລະວັດຖຸລະເບີດ, ໄລຍະຜ່ານມາຄະນະຮັບຜິດຊອບແຕ່ລະພາກສ່ວນ ໄດ້ລົງເຄື່ອນໄຫວຈັດຕັ້ງປະຕິບັດຕົວຈິງຢູ່ໃນ 34 ບ້ານ ທົ່ວເມືອງປາກທາ, ເຊິ່ງມີພໍ່ແມ່ປະຊາຊົນ ໄດ້ມີຄວາມຕື່ນຕົວ ແລະ ຈິງໃຈນໍາເອົາອາວຸດເສິກ, ອາວຸດລ່າເນື້ອ ແລະ ຈັກສະຕິນມາມອບໃຫ້ດັ່ງນີ້: ປືນແກັບຈໍານວນ 289 ກະບອກ, ປືນອັດລົມດັດແປງ 2 ກະບອກ, ເຄື່ອງຊ໋ອດປາ 3 ເຄື່ອງ, ຈັກສະຕິນ 27 ເຄື່ອງ, ປືນ AK 1 ກະບອກ, ປືນ CKC 1 ກະບອກ.
ຈາກນັ້ນ ກໍໄດ້ມີການເຊັນບົດບັນທຶກ ມອບອາວຸດດັ່ງກ່າວ ໃຫ້ກັບຄະນະຮັບຜິດຊອບ ເກັບກູ້ອາວຸດຂັ້ນແຂວງ ກໍຄືກອງບັນຊາການ ປກສ ແຂວງບໍ່ແກ້ວ ເພື່ອນໍາໄປເກັບມ້ຽນ ແລະ ທໍາລາຍຖິ້ມໃຫ້ຖືກຕ້ອງຕາມລະບຽບການແລະຂັ້ນຕອນຕໍ່ໄປ.
ພາບ-ແຫຼ່ງຂ່າວ: ປກສ ເມືອງປາກທາ.