ອີງຕາມການລາຍງານ ເຈົ້າໜ້າທີ່ພະແນກຕໍາຫຼວດ ສືບສວນ-ສອບສວນຄະດີອາຍາ ( ກອງຕໍາຫຼວດນິຕິວິທະຍາ ) ຫ້ອງຕໍາຫຼວດ ປກສ ນວ ໄດ້ຮັບແຈ້ງຄວາມທາງໂທລະສັບ ຈາກ ປກສ ເມືອງ ໄຊເສດຖາ ວ່າ: ມີຄົນເສຍຊີວິດ ( ໄຟຟ້າຊ໋ອດ ) ຢູ່ເຂດກວມລວມເສດຖະກິດພິເສດ ເມືອງໄຊເສດຖາ ນວ ເວລາ 08:00 ໂມງ ຂອງວັນທີ 03 ມິຖຸນາ 2024 ຜ່ານມາ.
ຈາກນັ້ນຈຶ່ງໄດ້ສົບທົບກັບ ພາກສ່ວນທີ່ກ່ຽວຂ້ອງ ລົງຊັນລະສູດຊາກສົບຕົວຈິ່ງ. ຜ່ານການກວດກາຂອງເຈົ້າໜ້າທີ່ ຜູ້ເສຍຊີວິດເປັນເພດຊາຍ ອາຍຸປະມານ 28 ປີ, ສູງປະມານ 1,62 cm ນຸ່ງເສື້ອຍືດສີດໍາແຂນສັ້ນ, ໂສ້ງຍີນຂາຍາວ ສີໝາກຄໍ້, ມີລາຍສັກຍັນຫ້າແຖວ ຢູ່ບ່າໄຫຼທາງຫຼັງທັງສອງເບື້ອງ ແລະ ກາງສັນຄໍ, ບໍ່ມີເອກະສານຕິດຕົວ ບໍ່ຮູ້ຊື່, ບ້ານ, ເມືອງ ແລະ ແຂວງ, ຢູ່ດ້ານນອກຂອງຊາກສົບແມ່ນ ພົບເຫັນຮ່ອງຮອຍບາດແຜທີ່ຖືກສະແສໄຟຟ້າຊ໊ອດ-ໄໝ້ ຢູ່ທົ່ວຕົນຕົວ, ສາເຫດຂອງການເສຍຊີວິດ ແມ່ນຫົວໃຈວາຍກະທັນຫັນ ຍ້ອນຖືກກະແສໄຟຟ້າຊ໋ອດ.
ດັ່ງນັ້ນ, ເຈົ້າໜ້າທີ່ຫ້ອງຕໍາຫຼວດ ປກສ ນວ ໄດ້ປະກາດຫາຍາດຕິພີ່ນ້ອງ ຜູ້ເສຍຊີວິດໃຫ້ມາຕິດຕໍ່, ພົວພັນເອົາຊາກສົບຜູ້ເສຍຊີວິດ. ປັດຈຸບັນ ຊາກສົບແມ່ນໄດ້ເກັບຮັກສາໄວ້ຢູ່ມູນນິທິຈີນ ນະຄອນຫຼວງວຽງຈັນ.
ແຫຼ່ງຂ່າວ: ປ້ອງກັນຄວາມສະຫງົບນະຄອນຫຼວງວຽງຈັນ