ສຳນັກຂ່າວ ຖານເສດຖະກິດ ລາຍງານ: ໃນວັນທີ 28 ພຶດສະພາ 2024, ທ່ານ ໄຊ ວັດຊະລົງ ໂຄສົກປະຈຳສຳນັກງານລັດຖະມົນຕີແຫ່ງປະເທດໄທ ໄດ້ເປີດເຜີຍວ່າ: ກອງປະຊຸມຄະນະລັດຖະມົນຕີມີມະຕິເຫັນດີໃນຫຼັກການດຳເນີນມາດຕະການ ແລະ ແນວທາງການອຳນວຍຄວາມສະດວກ ເພື່ອກະຕຸ້ນເສດຖະກິດ ແລະ ການທ່ອງທ່ຽວຂອງປະເທດໄທ 3 ໄລຍະກໍຄື: ໄລຍະສັ້ນ, ໄລຍະກາງ, ໄລຍະຍາວ.
ໃນນັ້ນ, ມາດຕະການໄລຍະສັ້ນ ແມ່ນຈະເລີ່ມປະຕິບັດ ໃນເດືອນມິຖຸນາ 2024 ເຊິ່ງປະກອບດ້ວຍ 5 ຂໍ້ ດັງນີ້:
1. ວີຊ່າຟຣີ ສາມາດເຂົ້າພັກເຊົາ ໃນປະເທດໄທບໍ່ເກີນ 60 ວັນ (ຜ.60) ເຊິ່ງແມ່ນປະເທດທີ່ໄດ້ຮັບສິດ (ຜ.30) ເກົ່າ ທັງໝົດ 57 ປະເທດ/ດິນແດນ ແລະ ເພີ່ມປະເທດທີ່ໄດ້ຮັບສິດ (ຜ.30) ໃໝ່ຈຳນວນ 36 ປະເທດ/ດິນແດນລວມເປັນທັງໝົດ 93 ປະເທດ. (ອ່ານລາຍລະອຽດປະເທດທີ່ສາມາດເດີນທາງເຂົ້າປະເທດໄທ)
2. ສຳລັບການໃຫ້ສິດ Visa on Arrival (VOA) ກໍຄື ການຂໍວີຊ່າຢູ່ທີ່ດ່ານກວດຄົນເຂົ້າເມືອງແມ່ນຍັງມີປົກກະຕິ ເຊິ່ງຈະໄດ້ປະຕິບັດຕາມກົດລະບຽບທີ່ໄດ້ກຳນົດ.
3. ເພີ່ມການກວດວີຊ່າປະເພດໃໝ່ Destination Thailand Visa (DTV) ສຳລັບຄົນຕ່າງດ້າວທີ່ມີທັກສະ ແລະ ການເຮັດວຽກທາງໄກ ເຊິ່ງສາມາດພຳນັກໃນປະເທດໄທເພື່ອເຮັດວຽກ ແລະ ທ່ອງທ່ຽວໄປພ້ອມກັນ ໂດຍມີນາຍຈ້າງ ແລະ ລູກຄ້າຢູ່ຕ່າງປະເທດ.
4. ການປັບປຸງສິດສຳລັບນັກສຶກສາຕ່າງຊາດທີ່ເຂົ້າຮຽນລະດັບປະລິນຍາຕີຂຶ້ນໄປທີ່ໄດ້ຮັບການກວດວີຊ່າ Non-Immigrant Visa ລະຫັດ ED ເຊິ່ງເປັນການອຳນວຍຄວາມສະດວກແກ່ນັກສຶກສາຕ່າງຊາດທີ່ກຳລັງສຶກສາ ຫຼື ກຳລັງຈະຈົບການສຶກສາໃນປະເທດໄທ ເພື່ອດຶງດູດຜູ້ທີ່ມີທັກສະເຂົ້າສູ່ຕະຫຼາດແຮງງານປະເທດໄທ.
5. ມີການແຕ່ງຕັ້ງຄະນະກຳມະການໂດຍກຳນົດນະໂຍບາຍການກວດວີຊ່າເພື່ອເປັນກົນໄກສຳຄັນໃນການກຳນົດນະໂຍບາຍການກວດວີຊ່າຂອງປະເທດໄທ.