ໃນວັນທີ 22 ເມສາ 2024 ຜ່ານມາ, ເຈົ້າໜ້າທີ່ພະແນກສະກັດກັ້ນ ແລະ ຕ້ານການຄ້າມະນຸດ ກອງບັນຊາການປ້ອງກັນຄວາມສະຫງົບແຂວງຊຽງຂວາງໄດ້ຮັບແຈ້ງຄວາມຈາກຜູ້ປົກຄອງ ຜູ້ຖືກເຄາະຮ້າຍຈາກການຄ້າມະນຸດ ຢູ່ບ້ານຈອມສີ ເມືອງຄຳ ແຂວງຊຽງຂວາງວ່າ: ມີກຸ່ມແກ້ງຢູ່ບ້ານດຽວກັນເຄື່ອນໄຫວຕົວະຍົວະເອົາຍິງສາວເພື່ອເອາໄປເປັນເມຍຄົນຈີນ ພາຍຫຼັງໄດ້ຮັບແຈ້ງຄວາມ ເຈົ້າໜ້າທີ່ຈຶ່ງໄດ້ຈັດຕັ້ງກຳລັງວິຊາສະເພາະລົງກວດກາ-ເກັບກຳຂໍ້ມູນຢ່າງລະອຽດ ຜ່ານການເກັບກຳຂໍ້ມູນຈຶ່ງໄດ້ຊອກຮູ້ ແລະ ກັກຕົວນາຍໜ້າທີ່ເຄື່ອນໄຫວຕົວະຍົວະເອົາຍິງສາວໄປຂາຍໃຫ້ຄົນຈີນໄດ້ຈຳນວນ 3 ຄົນຄື: ນາງ ໄມ ອາຍຸ 33 ປີ, ນາງ ທອງ ອາຍຸ 54 ປີ ແລະ ນາງ ພອນ ອາຍຸ 39 ປີ ທັງ 3 ແມ່ນ ປະຊາຊົນຢູ່ບ້ານຈອມສີ ເມືອງຄຳ ແຂວງຊຽງຂວາງ.
ຜ່ານການສອບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າ: ໄດ້ເຄື່ອນໄຫວຕົວະຍົວະເອົາຍິງສາວຢູ່ບ້ານດຽວກັນໄປເປັນເມຍຄົນຈີນແທ້ ເຊິ່ງໄດ້ເຄື່ອນໄຫວຕັ້ງແຕ່ປີ 2016 ເປັນຕົ້ນມາ ໂດຍມີຜູ້ຖືກເຄາະຮ້າຍຈຳນວນຫຼາຍເຊິ່ງຍິງສາວທີ່ຖືກຕົວະຢູ່ໃນລະຫວ່າງອາຍຸ 18-20 ປີ ຜູ້ກ່ຽວດັ່ງກ່າວນີ້ແມ່ນເປັນນາຍໜ້າໃຫ້ກັບຄົນຈີນທີ່ຢູ່ແຂວງຫຼວງນ້ຳທາ ໂດຍໃຫ້ອຸບາຍຕໍ່ຜູ້ປົກຄອງຂອງຜູ້ເສຍຫາຍວ່າ: ມີຄົນຈີນທີ່ເປັນຄົນໂສດ ແລະ ມີເງິນຫຼາຍ ຢາກໄດ້ເມຍເປັນຄົນລາວ ຖ້າຫາກຜູ້ໃດຕົກລົງແຕ່ງງານກັບບຸກຄົນດັ່ງກ່າວແມ່ນຈະໄດ້ຮັບຄ່າດອງຈຳນວນ 150 ລ້ານກີບ ຫຼັງຈາກຕົວະໄດ້ແລ້ວແມ່ນໄດ້ໄປສົ່ງໃຫ້ຄົນຈີນຢູ່ຊາຍແດນ ບໍໍ່ຫານ-ບໍ່ເຕັນ ແຂວງຫຼວງນ້ຳທາ ເພື່ອຂ້າມໄປປະເທດຈີນ.
ຕາມການລາຍງານຂອງຜູ້ກ່ຽວໄດ້ລະບຸວ່າ: ຍິງສາວໄດ້ຖືກຕົວະຍົວະມາຫຼາຍຄົນແລ້ວ ໂດຍຈຳນວນໜຶ່ງແມ່ນຍັງຢູ່ລາວ ແລະ ອີກຈຳນວນນຶ່ງແມ່ນຂ້າມໄປປະເທດຈີນ ຜູ້ກ່ຽວຍັງຮັບສາລະພາບອີກວ່າ: ການເປັນນາຍໜ້າຈະໄດ້ຮັບເງິນ 20-35 ລ້ານກີບຕໍ່ຄົນ/ຄັ້ງ ການກະທຳດັ່ງກ່າວນີ້ເຫັນວ່າມີເຈດຕະນາຕິດຕໍ່ເອົາຍິງສາວຄົນລາວໃຫ້ເອົາຜົວຄົນຈີນໂດຍ ຊອກຫາຂົນສົ່ງ ຫຼື ນຳສົ່ງ ແລະ ບໍ່ມີເອກະສານ ໂດຍໄດ້ຮັບຄ່າຕອບແທນ ເຊິ່ງເປັນການກະທຳຜິດຖານການຄ້າມະນຸດ ມາດຕາ 215 ຂອງປະມວນກົດໝາຍອາຍາ ສະບັບປັບປຸງປີ 2017 ດັ່ງນັ້ນເຈົ້າໜ້າທີ່ຈຶ່ງໄດ້ນຳຕົວຜູ້ກ່ຽວມາດຳເນີນຄະດີຕາມລະບຽບກົດໝາຍ ແລະ ຍັງຈະຂະຫຍາຍຜົນຫາກຸ່ມແກ້ງຜູ້ຮ່ວມຂະບວນການນຳກັນມາດຳເນີນຄະດີ ພ້ອມທັງຊອກຫາຊ່ອງທາງຊ່ວຍເຫຼືອຜູ້ຖືກເຄາະຮ້າຍທີ່ຍັງຢູ່ປະເທດຈີນກັບມາບ້ານເກີດເມືອງນອນ ດັ່ງນັ້ນຈຶ່ງຝາກໃຫ້ພໍ່ແມ່ປະຊາຊົນ ຊາວໜຸ່ມຍິງສາວໃຫ້ມີສະຕິລະມັດລະວັງຕົວບໍ່ໃຫ້ຫຼົງເຊື່ອກົນອຸບາຍຂອງກຸ່ມຄົນບໍ່ຫວັງດີທີ່ມາຕົວະຍົວະຫຼອກຫຼວງຢ່າງເດັດຂາດ ຖ້າຫາກພົບເຫັນນາຍໜ້າມາເຄື່ອນໄຫວຕົວະຍົວະຫຼອກຫຼວງຢູ່ພາຍໃນບ້ານໃຫ້ລາຍງານຕໍ່ເຈົ້າໜ້າທີ່ໂດຍຮີບດ່ວນ ເພື່ອຊອກຫາວິທີແກ້ໄຂໃຫ້ທ່ວງທັນຕໍ່ເວລາ.
ແຫຼ່ງຂ່າວ: ປກສ ແຂວງຊຽງຂວາງ