ກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ (ປກສ) ໄດ້ລາຍງານໃຫ້ຮູ້ວ່າ: ເດືອນເມສາ 2024 ທົ່ວປະເທດມີອຸບັດເຫດເກີດຂຶ້ນທັງໝົດ 710 ລາຍ, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 161 ລາຍ, ພາຫະນະເປ່ເພ 1.269 ຄັນ, ເພີ່ມຂຶ້ນ 310 ຄັນ, ຄົນໄດ້ຮັບບາດເຈັບ 1.167 ຄົນ ຍິງ 422 ຄົນ, ເພີ່ມຂຶ້ນ 249 ຄົນ, ເສຍຊີວິດ 96 ຄົນ ຍິງ 35 ຄົນ, ເພີ່ມຂຶ້ນ 11 ຄົນ.
ສະເພາະຢູ່ນະຄອນຫຼວງວຽງຈັນອຸບັດເຫດເກີດຂຶ້ນ 97 ລາຍ, ເພີ່ມຂຶ້ນ 8 ລາຍ, ພາຫະນະເປ່ເພ 196 ຄັນ, ເພີ່ມຂຶ້ນ 4 ຄັນ, ຄົນໄດ້ຮັບບາດເຈັບ 118 ຄົນ, ເພີ່ມຂຶ້ນ 19 ຄົນ, ຄົນເສຍຊີວິດ 12 ຄົນ, ເພີ່ມຂຶ້ນ 1 ຄົນ, ສາເຫດຂອງການເກີດອຸບັດເຫດມີຄື: ການດື່ມເຄື່ອງດື່ມທີ່ມີທາດເຫຼົ້າ, ໃຊ້ຄວາມໄວເກີນ, ບໍ່ປ່ອຍສິດ, ປ່ຽນທິດທາງເດີນ, ເຕັກນິກບໍ່ຮັບປະກັນ, ບໍ່ປ່ອຍສິດ, ຊີງຂຶ້ນໜ້າບໍ່ຮັບປະກັນ, ລ່ວງປ້າຍຫ້າມ ແລະ ອື່ນໆ.
ສຳລັບການຈັດອັນດັບແຂວງທີ່ເກີດອຸບັດເຫດຫຼາຍກວ່າໝູ່ແມ່ນ ນະຄອນຫຼວງວຽງຈັນ, ແຂວງວຽງຈັນ, ແຂວງຈຳປາສັກ, ແຂວງສະຫວັນນະເຂດ ແລະ ແຂວງຫຼວງພະບາງ, ສ່ວນແຂວງທີ່ມີຜູ້ເສຍຊີວິດຫຼາຍກວ່າໝູ່ແມ່ນ ແຂວງຈຳປາສັກ, ນະຄອນຫຼວງວຽງຈັນ, ແຂວງໄຊຍະບູລີ, ແຂວງວຽງຈັນ ແລະ ແຂວງອຸດົມໄຊ.