ສະຫະລັດອາເມລິກາ ມອບຄອມພິວເຕີ ແກ່ ສປປ ລາວ

0
176

ລັດຖະບານສະຫະລັດອາເມລິກາໄດ້ມອບຄອມພິວເຕີ້ຈຳນວນ 50 ໜ່ວຍ ເປັນມູນຄ່າຫຼາຍກວ່າ 145,000 ດອນລາ ໃຫ້ກັບກະຊວງການຕ່າງປະເທດ ເພື່ອຊຸກຍູ້ສົ່ງເສີມການເປັນປະທານອາຊຽນຂອງ ສປປ ລາວ, ໃນພິທີ ວັນທີ 6 ພຶດສະພາ 2024.

ເອກອັກຄະລັດຖະທູດສະຫະລັດອາເມລິກາ ປະຈຳ ສປປ ລາວ, ທ່ານນາງ ແຮັດເຕີ ວາເຣຍອາວາ ໄດ້ມອບຄອມພິວເຕີໃຫ້ກັບ ທ່ານ ຈະຕຸລົງ ບົວສີສະຫວັດ, ຫົວໜ້າກົມອາຊຽນ, ກະຊວງການຕ່າງປະເທດ. ນອກຈາກນີ້, ທ່ານນາງ ແຮັດເຕີ ວາເຣຍອາວາຍັງໄດ້ກ່າວວ່າ: “ສະຫະລັດອາເມລິກາໄດ້ຮັບຮູ້ເຖິງຄວາມຍິ່ງໃຫຍ່ຂອງວາລະກອງປະຊຸມສຸດຍອດອາຊຽນ ແລະ ກອງປະຊຸມຕ່າງໆທີ່ ສປປ ລາວ ຈະຈັດຂຶ້ນພາຍໃນປີ 2024 ນີ້, ພວກເຮົາປະທັບໃຈຫຼາຍທີ່ໄດ້ໂອກາດເຮັດວຽກຮ່ວມກັບ ບັນດາປະເທດຄູເຈລະຈາຂອງອາຊຽນ ແລະ ແຂກຮັບເຊີນອື່ນໆ, ມີສ່ວນຮ່ວມຊ່ວຍ ສປປ ລາວໃນຄວາມພະຍາຍາມເປັນປະທານອາຊຽນ ໂດຍມຸ້ງເນັ້ນໃສ່ໃນຫົວຂໍ້ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງຂອງອາຊຽນ” ໃຫ້ກັບບັນດາປະເທດສະມາຊິກອາຊຽນ.

ສະຫະລັດອາເມລິກາ ໄດ້ມີຄວາມມຸ້ງໝັ້ນຕໍ່ສູນກາງອາຊຽນ, ອິນໂດ-ປາຊີຟິກທີ່ເສລີ ແລະ ເປີດກວ້າງ, ແລະ ໄດ້ສະໜັບສະໜູນດ້ານຄວາມປອດໄພ ແລະ ຄວາມຈະເລີນຮຸ່ງເຮືອງຂອງບັນດາປະເທດຄູ່ຮ່ວມມື. ການມອບອຸປະກອນໃນຄັ້ງນີ້ແມ່ນເປັນສ່ວນໜຶ່ງຂອງຄວາມໝາຍໝັ້ນອັນຍາວນານ ແລະ ລັດຖະບານສະຫະລັດອາເມລິກາ ຍັງຈະສືບຕໍ່​ດຳ​ເນີນ​ການ​ເຈ​ລະ​ຈາ​ໃໝ່​ ແລະ​ ຊຸກ​ຍູ້​ຄວາມ​ຈະ​ເລີນ​ຮຸ່ງ​ເຮືອງ​​ຢູ່​ພາກ​ພື້ນ​ທີ່​ສຳ​ຄັນແຫ່ງ​ນີ້. ສະຫະລັດອາເມລິກາ ໄດ້ຢືນຢູ່ຮ່ວມກັບອາຊຽນເພື່ອຊຸກຍູ້ສົ່ງເສີມ ສິດທິມະນຸດ, ລະບຽບກົດໝາຍ ແລະ ການປົກຄອງທີ່ດີ.