ກອງບັນຊາການ ປກສ ແຂວງອຸດົມໄຊ ໄດ້ຈັດພິທີມອບ-ຮັບອຸປະກອນປ້ອງກັນຄວາມປອດໄພສຳລັບທາງ, ໃຫ້ກຽດເຂົ້າຮ່ວມ ແລະ ກ່າວມອບໂດຍ ພົຈວ ປອ ວັນທອນ ສຸລິສັກ ຮອງກົມໃຫ່ຍຕຳຫຼວດ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ແລະ ຕ່າງໜ້າຮັບໂດຍ ພັທ ກອງແກ້ວ ຫັດສະຈັນ ຮອງຫົວໜ້າກອງບັນຊາການ ປກສ ແຂວງອຸດົມໄຊ, ມີຄະນະພັກ-ຄະນະບັນຊາຈາກ 5 ແຂວງພາກເໜືອເຂົ້າຮ່ວມ ເປັນສັກຂີພິຍານ.
ການມອບ-ຮັບອຸປະກອນໃນຄັ້ງນີ້ ເພື່ອມອບໃຫ້ ກົມຕຳຫຼວດຈາລະຈອນ ມອບຕໍ່ໃຫ້ ພະແນກຕຳຫຼວດຈາລະຈອນ 5 ແຂວງພາກເໜືອຄື: ແຂວງອຸດົມໄຊ, ໄຊຍະບູລີ, ຜົ້ງສາລີ, ຫຼວງນ້ຳທາ, ແຂວງຫຼວງພະບາງ ແລະ 8 ເມືອງ ທີ່ນອນຢູ່ໃນໂຄງການຕາມເສັ້ນທາງ 2W-E; ອຸປະກອນທີ່ມາມອບໃນຄັ້ງນີ້, ປະກອບມີ ເຕັ້ນ 30 ອັນ, ໂຕະ 60 ໜ່ວຍ, ຕັ່ງ 180 ໜ່ວຍ, ຈວຍ 300 ອັນ, ປ້າຍຈຸດກວດກາ 30 ປ້າຍ, ຫວໍ (ສີແດງ) 30 ອັນ, LCD 29 ອັນ, ຖົງມື 15 ຄູ່, ສະຕິກເກີສະທ້ອນແສງ 20.000 ແຜ່ນ ແລະ ອຶ່ນໆອີກຈຳນວນໜຶ່ງ.
ເພື່ອນໍາໃຊ້ເຂົ້າໃນວຽກງານການບັງຄັບໃຊ້ກົດໝາຍ, ໂຄສະນາ, ເຜີຍແຜ່, ປູກຈິດສຳນຶກ ແລະ ການສຶກສາອົບຮົມ ໃຫ້ແກ່ປະຊາຊົນ, ພະນັກງານ, ທະຫານ, ຕຳຫຼວດ ແລະ ນັກຂັບຂີ່ທັງພາຍໃນ ແລະ ຕ່າງປະເທດ ທີ່ເດີນທາງໄປມາຫາສູ່ຕາມເສັ້ນທາງດັ່ງກ່າວ ໃຫ້ມີຄວາມປອດໄພຕໍ່ຜູ້ໃຊ້ລົດ-ໃຊ້ຖະໜົນ.
ພາບ-ຂ່າວ: ປກສ ແຂວງອຸດົມໄຊ