ວັນທີ 7 ພຶດສະພາທີ່ຜ່ານມາ, ຫົວໜ້າພະແນກຕຳຫຼວດ ປກສ ເມືອງຫາດຊາຍຟອງ ນະຄອນຫຼວງວຽງຈັນ ລາຍງານວ່າ: ວັນທີ 24 ມີນາ 2024 ຜ່ານມາ ເຈົ້າ ໜ້າທີ່ ປກສ ເມືອງຫາດຊາຍຟອງ ໄດ້ເຂົ້າກັກຕົວເປົ້າໝາຍສໍ້ໂກງຊັບແລກປ່ຽນເງິນຕາທາງເຟສບຸກ ພາຍຫຼັງໄດ້ຮັບແຈ້ງຈາກຜູ້ເສຍຫາຍສາມາດກັກຕົວ ໄດ້ 1 ຄົນ, ຢູ່ເສັ້ນທາງເຂດບ້ານນາທົ່ມ ເມືອງໄຊທານີ, ນະຄອນຫຼວງວຽງຈັນ ຊື່ທ້າວ ປະລິນຍາໂທ (ນາມສົມມຸດ) ອາຍຸ 34 ປີ ພັກເຊົ່າຢູ່ບ້ານດົງຊຽງດີ, ເມືອງນາຊາຍທອງ.
ຜ່ານການສືບສວນ-ສອບສວນຂອງເຈົ້າໜ້າທີ່ ຜູ້ກ່ຽວຮັບສາລະພາບວ່າ: ໄດ້ເລີ່ມສໍ້ໂກງຊັບມາແຕ່ ປີ 2020 ຈົນຮອດມື້ຖືກກັກຕົວ ຜູ້ກ່ຽວໄດ້ໂສ້ງໂກງຊັບທາງອອນລາຍມາແລ້ວຫລາຍຄັ້ງ ເຊິ່ງຄັ້ງຫລ້າສຸດແມ່ນຮັບແລກປ່ຽນເງິນຈຳນວນ 10.000 ຢວນຈາກຜູ້ເສຍຫາຍ, ໂດຍວິທີການແມ່ນສ້າງເຟສບຸກປອມຂຶ້ນມາ 9 ເພຈ ແລະ ເບີວັອບແອບ 2 ເບີ ແລ້ວເອົາຮູບຄົນອື່ນທີ່ໜ້າເຊື່ອຖືມາເປັນໂປຣຟາຍໜ້າເຟສບຸກແລ້ວໂພສໃນຮູບການຕ່າງໆ ໂດຍສະເພາະການຮັບແລກປ່ຽນເງິນຕາ.
ເມື່ອມີຄົນຫຼົງເຊື່ອກໍໃຫ້ໂອນເງິນຕາມາໃຫ້ຜູ້ກ່ຽວກ່ອນ ແລະ ສັນຍາວ່າຈະໂອນເງິນກີບຄືນໃຫ້ຕາມລາຄາທີ່ຕົກລົງແລກປ່ຽນກັນໄວ້, ເຊິ່ງການໂອນແມ່ນໃຫ້ໂອນຜ່ານບັນຊີຮ້ານແລກປ່ຽນເງິນຕາ ຫຼື ບຸກຄົນທີ່ຮັບໂອນເງິນອອກຕ່າງປະເທດ, ຈາກນັ້ນກໍຫາຮ້ານທີ່ຮັບໂອນເງິນກັບມາຄືນມາພາຍໃນປະເທດ, ເມື່ອເງິນຖືກໂອນກັບຄືນມາແລ້ວກໍໃຫ້ໂອນເຂົ້າຮ້ານຄ້າຕ່າງໆ ໂດຍສະເພາະໂອນເຂົ້າບັນຊີຮ້ານຊື້-ຂາຍຄຳ ເພື່ອຊື້ຄຳ, ສ່ວນເງິນທີ່ຍັງເຫຼືອ ແມ່ນຂໍເອົາເປັນເງິນສົດນຳເຈົ້າຂອງບັນຊີ, ເວລາຮັບສິນຄ້າ ຫຼື ຮັບເງິນ ແມ່ນຈ້າງຄົນຂັບລົດຂົນສົ່ງໄປຮັບມາໃຫ້, ແຕ່ບາງຄັ້ງກໍເຂົ້າໄປເອົາດ້ວຍຕົວເອງ ເມື່ອໄດ້ເງິນ ແລະ ຄຳແລ້ວໄດ້ເອົາເງິນມາໃຊ້ຈ່າຍພາຍໃນຄອບຄົວ, ພ້ອມທັງເອົາເງິນໄປຊື້ທີ່ດິນ ແລະ ປຸກສ້າງເຮືອນ 1 ຫຼັງ. ເຈົ້າໜ້າທີ່ ປກສ ລາຍງານຕື່ມວ່າ: ປັດຈຸບັນຄະດີດັ່ງກ່າວເຈົ້າໜ້າທີ່ພວມສືບຕໍ່ເກັບກຳຂໍ້ມູນ, ເພື່ອດຳເນີນການສືບສວນ-ສອບສວນຕາມຫຼັກການ ແລະ ກົດໝາຍ.
ທີ່ມາ: ວສລ, ປ້ອງກັນຄວາມສະຫງົບນະຄອນຫຼວງວຽງຈັນ